მარგვეთისა და უბისის ეპისკოპოსი მელქისედეკი ეკლესიის რეიტინგის კლებას სხვა საკითხებთან ერთად ქვეყნიდან მომხრეების გასვლასაც უკავშირებს. მისივე თქმით, რეიტინგის კლება სამწუხაროა და ამაზე ბევრი ფაქტორი მოქმედებს, მათ შორის საპატრიარქოში განვითარებული ბოლოდროინდელი მოვლენები.

"მე არ გამოვრიცხავ კიდევ ერთ რამეს. ბევრი გადის ქვეყნიდან, მომხრეებიც, ალბათ, გასულები არიან", — განაცხადა მეუფე მელქისედეკმა.

NDI-ს კვლევის მიხედვით, მართლმადიდებელი ეკლესიის საქმიანობის დადებითმა შეფასებამ 50 პროცენტამდე დაიკლო. ბოლო ხუთი წლის განმავლობაში ეს ყველაზე დაბალი მაჩვენებელია.

კვლევაში აღნიშნულია, რომ 2015 წლიდან 2019 წლამდე ეკლესიის საქმიანობის "კარგმა" შეფასებამ 25 პროცენტული პუნქტით დაიკლო. მხოლოდ 2019 წელს ივლისიდან ნოემბრამდე დადებითმა შეფასებამ 64 პროცენტიდან 50 პროცენტამდე დაიკლო.

ამავე კვლევის თანახმად, მოსახლეობის 12 პროცენტი ფიქრობს, რომ ეკლესიის საქმიანობა ცუდია, ხოლო 25 პროცენტი — საშუალო.