როგორც უკვე ვიცით, HBO სატელევიზიო ისტორიაში ერთ-ერთი ყველაზე გახმაურებული სერიალის, Game of Thrones-ის სპინოფს იღებს. სულ ცოტა ხნის წინ კი ახალი შოუს გამოსვლის თარიღიც გახდა ცნობილი.

Television Critics Association-ის მიერ გამართულ შეხვედრაზე HBO-ს პროგრამირების დირექტორმა, კეისი ბლოისმა განაცხადა, რომ სერიალს დიდი ალბათობით 2022 წელს ვიხილავთ.

მისივე განცხადებით, ყინულისა და ცეცხლის სიმღერის სერიის ავტორი, ჯორჯ მარტინი და სცენარისტი, რაიან კონდალი უკვე წერენ ახალი შოუს სცენარზე:

"ისინი ერთ ოთახში უკვე მუშაობენ ახალი ისტორიის შექმნაზე, რომლის ეკრანებზე ხილვაც, ჩემი ვარაუდით, 2022 წელს შეგვეძლება".

დრაკონების სახლი — ასე ერქმევა ახალ სერიალს, რომელიც Game of Thrones-ში აღწერილ სიუჟეტამდე 300 წლით ადრე განვითარებულ მოვლენებზე მოგვითხრობს. სერიალს ჯორჯ მარტინის წიგნის, Fire & Blood-ის მიხედვით იღებენ, რომელშიც ტარგარიენების საგვარეულო ისტორიას ვეცნობით.

HBO-ს პროგრამირების დირექტორის, კეისი ბლოისის განცხადებით, სანამ ამ სერიალის გადაღება გადაწყდებოდა, მანამდე სხვა ალტერნატივებსაც განიხილავდნენ, მათ შორის ერთ-ერთი გაცილებით ადრინდელი ისტორიის გაცოცხლებას ისახავდა მიზნად, თუმცა საბოლოოდ არჩევანი დრაკონების სახლზე შეჩერდა:

"ეს იდეაც შესანიშნავი იყო, უბრალოდ ამ შემთხვევაში სიუჟეტი ჩვენთვის ნაცნობ მოვლენებამდე 8 000 წლით ადრე ვითარდებოდა და მის შესაქმნელად უფრო მეტი შრომა იყო საჭირო. დრაკონების სახლის შემთხვევაში კი არსებობდა წიგნი, რომელსაც დავეყრდნობოდით და უფრო მარტივად შევასხამდით ხორცს ამ სამყაროს".

თუ გავითვალისწინებთ იმას, რომ სერიალს HBO იღებს, ისტორია კვლავ GOT-ის სამყაროში განვითარდება და სცენარს ჯორჯ მარტინი წერს, მაშინ დარწმუნებით შეგვიძლია ვთქვათ, რომ წინ კიდევ ერთი ეპიკური შოუ გველოდება.