სამოქალაქო აქტივისტების თქმით, სოლიდარობის აქტი საშობაო გარევაჭრობა დედაენის ბაღში წარმატებით დასრულდა. მათი თქმით, გარემოვაჭრეებმა იმ პროდუქციის დიდი ნაწილის გაყიდვა შეძლეს, რომლიც საახალწლოდ რესპუბლიკის მოედანზე უნდა გაეყიდათ.

"საახალწლო პროდუქციის დიდი ნაწილი, რომლის გაყიდვის საშუალებას თბილისის მერიის წარმომადგენლები გარემოვაჭრეებს არ აძლევდნენ, დღეს გაიყიდა. ყველაფერთან ერთად, შეგროვდა თანხა დაჯარიმებული გარემოვაჭრეებისთვის. მადლობა დღევანდელი დღისთვის", — წერენ ორგანიზატორები.

ფოტო: სირცხვილია

დედაენის ბაღში საშობაო ბაზრობა სამოქალაქო აქტივისტებმა დღეს, 5 იანვარს დილის 12 საათიდან საღამოს 6 საათამდე გამართეს. ბაზრობაზე მიწვეულები იყვნენ სხვადასხვა სტარტაპები, ხელნაკეთი ნივთების გამყიდველები და უბრალო მოქალაქეები. აქტივისტებს ამ ფორმით სურდათ სოლიდარობა გამოეხატათ იმ ადამიანებისთვის, რომლებმაც შვილმოკლულ მამას სოლიდარობა გამოუცხადეს.

2 იანვარს თბილისის მერიის მუნიციპალური სამსახურის წარმომადგენლებმა გარემოვაჭრეებს რესპუბლიკის მოედნის ტერიტორია დაატოვებინეს და პარლამენტის წინ განლაგებულ დახლებზე გადასვლა მოსთხოვეს. გარემოვაჭრეების ნაწილმა თქვა, რომ არ სურთ ვაჭრობა იქ, სადაც შვილმოკლული მამის საპროტესტო კარავი იდგა.

31 დეკემბრის ღამეს მერიამ შვილმოკლული მამის, მალხაზ მაჩალიკაშვილისა და პატიმრობაში მყოფი დეკანოზ მამალაძის ძმის კარვები აშალა და პარლამენტის წინ ზვიგენის გასაბერი ბატუტი დადგა. კარვების დაშლას ადგილზე დაპირისპირება მოჰყვა, შინაგან საქმეთა სამინისტრომ ღამით 9 აქტივისტი დააკავა.

მეორე დღესვე მერიამ ეს ბატუტი ვიზუალის გამო დაიწუნა, ჩაფუშა და მის ნაცვლად სხვა ატრაქციონები დადგა. ახალი წლის ღამეს მაჩალიკაშვილი, აქტივისტები და ოპოზიციის ლიდერები პარლამენტის წინ შეიკრიბნენ და მომხდარი გააპროტესტეს. ატრაქციონები, რომელიც ბავშვებისთვის იყო განკუთვნილი პოლიციას ჰქონდა შემოსაზღვრული ჯებირებითა და მანქანებით. დახლები კი, რომლებიც საახალწლო პროდუქციისთვის იყო განკუთვნილი, ცარიელი იდგა.