დღეს, 24 ნოემბერს ჰონგ-კონგში რაიონული საბჭოების არჩევნები მიმდინარეობს. აღნიშნული არჩევნები განსაკუთრებით მნიშვნელოვანია, რადგან ექვს თვეზე მეტია, რაც რეგიონში აქციები და დემონსტრაციები მიმდინარეობს.

ჰონგ-კონგი 18 რაიონისაგან შედგება, თითოეულში კი რაიონული საბჭოა. საბჭოები ძირითადად ადგილობრივ საკითხებზე მუშაობს — გზების შეკეთება, ინფრასტრუქტურის განვითარება და ა.შ. ამჟამად მოსახლეობამ რაიონული საბჭოების 479 წევრიდან 452 უნდა აირჩიოს. საბჭოების წევრების 75 პროცენტს პროსახელისუფლებო პარტიები აკონტროლებენ.

რეგიონული დონის გადაწყვეტილებებში რაიონული საბჭოების გავლენა მცირეა. ჰონგ-კონგის საკანონმდებლო ორგანოში, რომლის არჩევნები 2020-შია, 70-დან 6 ადგილს საბჭოების წევრები იკავებენ. გარდა ამისა, საბჭოების წევრები ჰონგ-კონგის ადმინისტრაციის ხელმძღვანელის არჩევნებში იღებენ მონაწილეობას.

წლევანდელი არჩევნების მნიშვნელობაზე ისიც მეტყველებს, რომ 2015 წლის არჩევნებთან შედარებით კენჭისყრისთვის 12 პროცენტით მეტი დარეგისტრირდა.

საარჩევნო უბნები ადგილობრივი დროით 7:30 საათზე გაიხსნება და 22:30 საათზე დაიხურება. წინასწარი მონაცემები 25 ნოემბერს იქნება ცნობილი.

მიუხედავად იმისა, რომ არჩევნებს ჰონგ-კონგის პოლიტიკური სისტემის ძირეული ცვლილება არ შეუძლია, ის პროდემოკრატიული მოძრაობის მხარდაჭერის ინდიკატორი იქნება. რეგიონის ხელისუფლება ამტკიცებს, რომ მათ მოსახლეობის უმრავლესობა მხარს უჭერს.