საპარლამენტო უმრავლესობის ლიდერი, გია ვოლსკი ეჭვობს, რომ პარლამენტის პიკეტირება სახელმწიფო ბიუჯეტის პროექტის ჩაგდებას უკავშირდება. ამის შესახებ მან გადაცემა კვირის თემაში განაცხადა.

"დამატებითი ეჭვი მაქვს, იქნებ ბიუჯეტზეა საერთოდ გალაშქრება. ბიუჯეტი არის გათვლილი ადამიანზე, რომელიც ჩვენ მას შემდეგ შევადგინეთ, რაც ათასობით სოფელი მოვიარეთ. ამას ყველაფერს ანალიზი გაუკეთეს და დაძაბეს სიტუაცია მას მერე, რაც ჩირაღდანი დაიჭირეს ხელში. ამის ჩაგდება არის ქვეყნის ღალატი", — განაცხადა ვოლსკიმ გადაცემა კვირის თემაში.

დღეს, 17 ნოემბერს პარლამენტის წინ სხვადასხვა ოპოზიციური პარტიისა და სამოქალაქო მოძრაობის მიერ ორგანიზებული საპროტესტო აქცია გაიმართა. პარალელურად პატრიოტთა ალიანსის ორგანიზებული აქცია მიმდინარეობდა რესპუბლიკის მოედანზე.

ევროპულმა საქართველომ და ნაციონალურმა მოძრაობამ საკანონმდებლო ორგანოს პიკეტირება დააანონსეს. დემონსტრანტები აცხადებენ, რომ ორშაბათიდან პარლამენტში ქართულ ოცნების ვერც ერთი დეპუტატი ვეღარ შევა. მათ შენობის შესასვლელებთან კარვები გაშალეს და სიმბოლურად ბოქლომები დაკიდეს.