ცაგერისა და ლენტეხის მიტროპოლიტი სტეფანეს თქმით, პატრიარქის მიმართ ყველა მიმართულებით შანტაჟი იყო. ამის შესახებ მან სინოდის სხდომის დასრულების შემდეგ ჟურნალისტებთან ისაუბრა. მან აღნიშნა, რომ პეტრე ცაავა აშანტაჟებდა სინოდს, რომ არ მიეღოთ "სწორი გადაწყვეტილებები".

"ჯერ ერთი, მან როცა დაიწყო საუბარი, აბსოლუტურად სხვა თემებზე ლაპარაკობდა, რომ თუ უწმინდესი პირობას მომცემს და ამას ასე და ასე გააკეთებს, მაშინ მე არაფერს არ ვიტყვი. მას უნდოდა სინოდალური მმართველობის შემოღება, თავისი წინადადებები ჰქონდა, ოღონდ იმ მომენტში ამ საკითხზე არ იყო საუბარი", — თქვა მიტროპოლიტმა სტეფანემ.

მიტროპოლიტის თქმით, პეტრე "უაზრობებს ყვიროდა" და პატრიარქთან მისვლისთანავე მას წინ ჩაუდგნენ სხვა მღვდელმთავრები. პატრიარქის კითხვას, თუ რატომ აყენებდა შეურაცხყოფას მან არ უპასუხა. მიტროპოლიტმა სტეფანემ ასევე აღნიშნა, პატრიარქს მამა გიორგი მამალაძის საკითხზეც აშანტაჟებდნენ.

სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში "მამათმავლობის ცოდვის" მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.