მართლმადიდებელ მშობელთა კავშირის წევრებმა ინტერნეტში ვიდეო გაავრცელეს, სადაც ამბობენ, რომ დღეს, 1 ოქტომბერს, რომის პაპს მცხეთაში, სვეტიცხოვლის საკათედრო ტაძარში შესვლის ნებას არ მისცემენ:

"ჩვენ კიდევ გვაქვს ბრძოლა წინ. დღეს, 5 საათზე, ყველანი სვეტიცხოველთან დავდგეთ და აი ამ პიროვნების, ამ კომედიანტის, რომელსაც რომის პაპი ჰქვია, რომალეთა პაპი ჰქვია, ყველაფერი გავაკეთოთ, რომ იქ ფეხი არ დადგას. არა ჩხუბით, ომით, არამედ ისე მშვიდობიანად, როგორც ამას ეს დღეებია ვაკეთებთ. თუ ღმერთი დაუშვებს რომ შევა იქ, ეს რა თქმა უნდა ღვთის ნება იქნება და ჩვენი ცოდვების გამო მოხდება, ჩვენი სისუსტის გამო. ჩვენ წინააღმდეგი ვართ ყველანაირი მწვალებლობის აღსრულების საქართველოში. ჩვენ მართლმადიდებელი ხალხი ვართ და მართლმადიდებლობას პატივი უნდა ვცეთ. ჩვენ გვიყვარს ყველა ადამიანი, მაგრამ გვძულს ცოდვა რომელსაც მწვალებლობა ჰქვია. იძულებული ვართ ქართველ ხალხს ავუხსნათ, რომ იქ რაც ხდება, ეს არის უდიდესი დანაშაული".

რომის პაპმა დღეს დილით, თბილისში მიხეილ მესხის სტადიონზე მესა აღავლინა. სტადიონზე საქართველოს პრეზიდენტი, პირველი ლედი, აღასრულებელი და საკანონმდებლო ხელისუფლების, დიპლომატიური კორპუსის წარმომადგენლები იმყოფებოდნენ.

დღესვე, პაპი ფრანცისკე კათოლიკური ეკლესიის წარმომადგენლებს შეხვედა შემდეგ კი, მცხეთაში, სვეტიცხოვლის საკათედრო ტაძარს მოინახულებს. პაპის ვიზიტი ხვალ დილით, 2 ოქტომბერს სრულდება, რა დროსაც იგი აზერბაიჯანში გაემგზავრება.