გიყვარს მოგზაურობა, გაქვს დრო და არ იცი სად და როგორ დახარჯო? მაშინ მოემზადე - იყიდე იაფი ბილეთები ქუთაისის საერთაშორისო აეროპორტიდან ქუთაისი-ბუდაპეშტის რეისზე, ჩაალაგე ბარგი და მოიწყე დაუვიწყარი მოგზაურობა ცენტრალური ევროპის ერთ-ერთ ულამაზეს და იაფ ქალაქში, რომელიც იუნესკოს მსოფლიო მემკვიდრეობის ძეგლთა სიაშია შესული.

ბუდაპეშტი — მდინარე დუნაით გაყოფილი ქალაქი აუცილებლად მოგხიბლავს ევროპული არქიტექტურითა და გემრიელი სამზარეულოთი. პეშტი უფრო ახალია და ხმაურიანი, როგორც ამბობენ უფრო ცოცხალი, მაგრამ თუ სიძველის მოყვარული ხარ, მაშინ ბუდას მხარე შენი ადგილია. ძველი ევროპული არქიტექტურა და თვალისმომჭრელი ხედები შენს განწყობას აუცილებლად აამაღლებს.

3-საათიანი მგზავრობის შემდეგ აეროპორტიდან ბუდაპეშტის ცენტრში გამოსვლა ძალიან მარტივია და ორი გზით არის შესაძლებელი: ერთი სწრაფი და შედარებით ძვირია, მაგრამ მეორე — იაფი და ნელი.

ავტობუსი #100E, რომლის გაჩერებაც ჩამოფრენის გეითის გამოსასვლელშია, სულ რაღაც ოთხ გაჩერებაში მოგიყვანს ცენტრში. სამგზავრო ბილეთს გაჩერების წინ მდგარ ჯიხურში ყიდულობ, რომლის ფასიც 900 ფორინტია (9 ლარი), ხოლო ავტობუსი #200E, რომელიც ასევე ჩამოფრენის გეითის წინ მდგარი გაჩერებიდან გამოდის, 3,50 ლარად მიგიყვანს ცენტრში.

ჩამოფრენისთანავე ფულს აეროპორტში ნუ გადაცვლით, რადგან კურსი დაბალია და უმჯობესია, ცენტრში მდებარე ვალუტის ჯიხურები გამოიყენოთ. ხოლო თუ ბილეთის საყიდლად ფული გჭირდებათ, მხოლოდ მცირე რაოდენობა გადაცვალეთ აეროპორტში. ბილეთების ჯიხურში ბარათით გადახდაც შეგიძლიათ.

რა ვნახო პირველი?

მოხვედით ცენტრში, დაბინავდით წინასწარ დაჯავშნილ სასტუმროში, მაგრამ არ იცით, როგორ დაიწყოთ თქვენი მოგზაურობა?

სტარტი ქალაქში მდებარე ქალაქიდან აიღეთ, რომელსაც ბუდას ციხე-ქალაქი ჰქვია. ამ უბანში მდებარეობს სამეფო სასახლე, ეროვნული გალერეა, ეროვნული ბიბლიოთეკა, წმ. მატიაშის ტაძარი, მეთევზეთა ბასტიონი და ფუნიკულიორი. პირველად მე-13 საუკუნეში აშენებული კომპლექსი ისტორიული ციხე-ქალაქია და აქ მისასვლელად ორი გზა შეგიძლია აირჩიო: ფეხით, ან დეაკ ფერენს ტერეს გაჩერებიდან #16 ნომერი ავტობუსით.

ქალაქის ღირსშესანიშნაობები ერთმანეთთან ახლოს მდებარეობს და ფეხითაც შეგიძლიათ დაათვალიეროთ მარტივად, მაგრამ თუ ტრანსპორტით გადაადგილება გირჩევნიათ, არ დაგავიწყდეთ ბილეთის შეძენა, რადგან კონტროლიორები მუდმივად ამოწმებენ და თუ გამოგიჭირეს, ჯარიმა ძალიან მაღალია.

ბუდას ციხე-ქალაქის ნახვისა და ბუდაპეშტის ზედა ხედით დატკბობის მერე, შეგიძლიათ იქვე მდებარე ჯაჭვის ხიდი ნახოთ, რომელიც 1849 წელს აშენდა და პირველი ხიდია, რომელმაც ქალაქის ორი მხარე ერთმანეთს დააკავშირა.

ადგილები, რომლებიც ბუდაპეშტში არ უნდა გამოტოვოთ

გთავზობთ ტოპ-ადგილებს, რომლებიც აუცილებლად უნდა ნახოთ ევროპის ერთ-ერთ ულამაზეს ქალაქში:

1. წმინდა სტეფანეს ბაზილიკა;
2. პარლამენტის შენობა;
3. ფეხსაცმელების მემორიალი;
4. ჯაჭვის ხიდი;
5. ბუდას ციხე-ქალაქი;
6. ციტადელა;
7. ბაზარი;
8. ზიმპლა კერტი;
9. რკინიგზის სადგური;
10. მარგარეტის კუნძული;
11. და რა თქმა უნდა, გმირთა მოედანი.

რა მივირთვა?

ზემოთ ჩამოთლილი ადგილების ნახვის შემდეგ, ალბათ დაღლილი იქნებით, რასაც განსაკუთრებით უხდება ბუდაპეშტის გემრიელი სამზარეულო.

ადგილობრივ კერძებს შორისაა ხორცის წვნიანი გულ(ი)აში, რომელიც განსაკუთრებით ხორცისმოყვარულებს მოეწონებათ. თუ მას ცხარე წიწაკისა და პომიდვრის სოუსით გასინჯავთ, უფრო უკეთ შეიგრძნობთ მის შესანიშნავ გემოს. ის ქალაქის არაერთ ნაწილში შეგიძლიათ მიირთვათ.

თუ დესერტის გასინჯვაც მოგინდებათ მაშინ არ დაგავიწყდეთ, რომ უნგრეთი განთქმულია Kurtoskalacs-ის დამზადებით და ის ქალაქის ნებისმიერ წერტილში შეგიძლიათ იპოვოთ.

თუ რაიმე გაუგებარი მიზეზის გამო უცხო კერძებისა თუ დესერტების გასინჯვა არ გიყვართ, მაშინ შეგიძლიათ მარიკა ბებოს (ნეინის) ბურგერების კაფეს ეწვიოთ, სადაც ტრადიციული ან ნაცნობი საკვები დაგხვდებათ.

პეშტის მხარეს მდებარე მარიკა ნეინის ბურგერები ადგილობრივებში ძალიან ცნობილია და მას ყოველდღე უამრავი სტუმარი ჰყავს.

რა გამოარჩევს მის ბურგერებს სხვა ბურგერებისგან? როგორც მარიკა ნეინი ამბობს, ისინი ადგილზე მზადდება და ყველა პროდუქტი ახალია, რადგან ინგრედიენტებს ბაზარში ყოველდღიურად თვითონ ყიდულობს.

ხედებით დავტკბით, სამზარეულოთი აღვფრთოვანდით და დადგა დრო გართობისა. ბუდაპეშტი ცნობილია ღამის ცხოვრებით და არაერთი შესანიშნავი კლუბი შეგიძლიათ აღმოაჩინოთ პეშტის მხარეს, ცნობილ Ruin Pubs უბანში, სადაც დროს შესანიშნავად გაატარებთ.

კეთილი იყოს შენი მობრძანება უნგრეთში/ Isten hozott Magyarországon!

აღმოსავლეთ პარტნიორობა წელს ათი წლის იუბილეს ზეიმობს. ეს თანამშრომლობა ევროკავშირს, მის წევრ ქვეყნებსა და საქართველოს შორის, მნიშვნელოვანი სარგებლის მომტანი აღმოჩნდა ჩვენი თანამოქალაქეებისათვის. ვიზალიბერალიზაცია ერთ-ერთი გამორჩეული მიღწევაა, რამაც საქართველო ევროკავშირთან უფრო მეტად დააახლოვა. დაახლოებით 300 000-მა საქართველოს მოქალაქემ უკვე იმოგზაურა ევროკავშირის ქვეყნებში ვიზის გარეშე და ახალი ტურისტული ღირსშესანიშნაობები აღმოაჩინა.