ბრაილის შრიფტის ცოდნა მხედველობის პრობლემების მქონე ადამიანებისთვის უმნიშვნელოვანესი უნარია, ლეგოს ახალი პროექტის, Braille Bricks-ის დახმარებით, ბავშვები შეძლებენ კითხვა თამაშ-თამაშით ისწავლონ. თუ გავითვალისწინებთ ლეგოს ნაწილების ბუნებრივ აგებულობას, გასაკვირიც კია, რომ ეს იდეა ათწლეულების წინ არ გაჩნდა.

ბრაილისშრიფტიან ფიგურებს, სტანდარტულისგან განსხვავებით, რვა "ბორცვი" არ აქვთ. მათზე ბრაილის ასოებია დატანილი, ქვედა ნაწილში კი შესაბამისი აღმნიშვნელი დაბეჭდილიც არის - მხედველი ადამიანებისათვის.

ფიგურები არსებულ აგურებთან თავსებადია.

ფოტო: The Lego Foundation

ფოტო: The Lego Foundation

ფოტო: The Lego Foundation

ნაკრები, რომელიც ამჟამად რამდენიმე ქვეყანაში გამოსაცდელად გამოუშვეს, 250 ნაწილისგანაა დაკომპლექტებული. მასში ერთიანდება მთელი ანბანი, ციფრები 0-9-მდე, მათემატიკური სიმბოლოები და სხვა "არასტანდარტული" ფიგურები ინსპირაციისათვის.

ლეგო აქამდეც მიეკუთვნებოდა სათამაშოთა იმ არცთუ დიდ რიცხვს, რომლითაც არა მხოლოდ მხედველ, არამედ უსინათლო ბავშვებსაც შეუძლიათ გართობა. ახალი ინიციატივა კი გასართობს სულ სხვა მნიშვნელობას სძენს.

ბრაილისშრიფტიანი ფიგურები მასობრივ გაყიდვაში 2020 წლიდან ჩაეშვება.