თიბისი უკვე მრავალი წელია გამოირჩევა ინოვაციების დანერგვით, ამჯერად კი კომპანიისთვის უმნიშვნელოვანესი ეტაპი იწყება. თიბისი ახალ ორგანიზაციულ სტრუქტურაზე გადასასვლელად ემზადება, რომელსაც ეჯაილი ეწოდება. ამ ცვლილებაზე კომპანიაში უკვე დიდი ხანია მუშაობენ, თუმცა აქამდე მოსამზადებელი ეტაპი იყო, ახლა კი იმპლემენტაციის დრო დადგა.

რა არის ეჯაილი?

ეჯაილი (Agile) სიტყვა-სიტყვით მოქნილს ნიშნავს და ეს მართლაც ასეა. ეჯაილის პრაქტიკა გულისხმობს ორგანიზაციაში ბიუროკრატიის შემცირებასა და მიმდინარე პროექტების უფრო ეფექტურად განხორციელებას. ეს მიზანი შემდეგნაირად მიიღწევა: ერთი პროექტის გარშემო ერთიანდება ერთი გუნდი, რომლის შემადგენლობაშიც სხვადასხვა კომპეტენციის ადამიანები შედიან.

პროექტების ამგვარი დანაწილება ნიშნავს, რომ გუნდები უფრო მოქნილები, დამოუკიდებლები და ამოცანაზე კონცენტრირებულები იქნებიან, რაც ხელს შეუწყობს ნაკლებად სტრესულ გარემოში საქმის კეთებას. გარდა ამისა, გუნდები უფრო მობილურები იქნებიან, რადგან მის შემადგენლობაში სწორედ ის ადამიანები იქნებიან, ვინც პროექტის განსახორციელებლადაა საჭირო. მაგალითად: მარკეტერი, გრაფიკოსი, პროგრამისტი და სხვ.

ერთ-ერთი მთავარი პლუსი, რაც ეჯაილის სტრუქტურას აქვს, იერარქიების შემცირებაა. ეს ნიშნავს იმას, რომ კომპანიაში დეპარტამენტებისა და მათი ხელმძღვანელების ნაცვლად, შეიქმნება ლიგები, გუნდები, ცოდნის ცენტრები და ლეგიონები.

ლიგები

ლიგები ეჯაილ სტრუქტურაში ყველაზე დიდი ერთეული იქნება, რომელიც 50-150 ადამიანისგან შედგება. ლიგები კომპანიის ბიზნეს მიმართულებას განსაზღვრავენ და თავისმხრივ იყოფიან სხვადასხვა გუნდებად.

გუნდები

ლიგებში შემავალი გუნდები დამოუკიდებელი თვითორგანიზებული ერთეულები არიან, რომლებიც ერთი კონკრეტული მიზნის მისაღწევად იქმნებიან. თითოეული გუნდი მაქსიმუმ 9 წევრისგან შედგება, რომელთა შორის სხვადასხვა კომპეტენციის ადამიანები შედიან.

ეჯაილის გუნდების სტრუქტურა კარგად შეიძლება ავხსნათ სპორტული გუნდის მაგალითზე. წარმოიდგინეთ რაგბის ნაკრები, რომელსაც სხვადასხვა პოზიციაზე მოთამაშე მორაგბეები ჰყავს - შერკინების, უკანა ხაზელები და სხვ. თითოეულ მორაგბეს თავისი დავალება აქვს, რომელსაც გუნდის საერთო მიზნის, ანუ გამარჯვების მისაღწევად ასრულებს.

სწორედ ასე მუშაობს ეჯაილის სტრუქტურაში შემავალი გუნდებიც. რაგბის ნაკრების მსგავსად, მასაც ჰყავს გუნდის კაპიტანი, გუნდის წევრი, მწვრთნელი და ექსპერტი.

ლეგიონები

ლეგიონის თითოეული წევრი თავისმხრივ რომელიმე გუნდის წევრიც არის, თუმცა ისინი ცალკე გაერთიანებასაც წარმოადგენენ. თითოეულ ლეგიონში ერთი კომპეტენციის სპეციალისტი 5-10 წევრი შედის, რომლებიც ქმნიან სტანდარტებსა და კონკრეტულ კომპეტენციებს. ამის მაგალითი შეიძლება იყოს ხარისხის მართვის მენეჯერების ლეგიონი.

ცოდნის ცენტრები

ცოდნის ცენტრები, ეჯაილის სტრუქტურის სხვა ნაწილებისგან განსხვავებით, ცალკე მდგომი ერთეულია, რომლის მიზანიც ეჯაილ ორგანიზაციის მხარდაჭერაა. ისინი საქმეში ერთვებიან ორგანიზაციის საჭიროებებიდან გამომდინარე, სირთულეების გადასალახად და ექსპერტული რჩევების მისაცემად.

ეჯაილის სტრუქტურაზე თიბისის 500 თანამშრომელი უკვე გადავიდა, უახლოეს მომავალში კი, მთელი ორგანიზაცია ჩაერთვება.