თუ სამეფო კარის თამაშების განვლილმა სეზონებმა რაიმე გვასწავლა, ეს, პირველ რიგში, ისაა, რომ არავინ არაფრისგან არის დაზღვეული, არადა, ვესტეროსი საცხოვრებლად უსაფრთხო ადგილი ნამდვილად არაა.

როგორც სერიალის შემქმნელები ამბობენ, არც მერვე სეზონში უნდა გვქონდეს სიმშვიდისა და სტაბილურობის იმედი და რაკი საყვარელ გმირებზე გული ყველას შეგვტკივა, ისღა დაგვრჩენია, ამ რთულ პირობებში მათ სხვადასხვა ტიპის დაზღვევა შევურჩიოთ.

1. სიცოცხლის დაზღვევა - ჯონ სნოუ

სიცოცხლის დაზღვევა სამეფო კარის თამაშების პერსონაჟებს ყველაზე მეტად სჭირდებათ, რადგან ყველაფერი მათ წინააღმდეგ მოქმედებს: ამინდი, გეოპოლიტიკური მდგომარეობა და მაყურებლის სიყვარულიც კი (საკმარისია, რომელიმე გმირი შეგვიყვარდეს, რომ მაშინვე გვიკლავენ ხოლმე).

რა თქმა უნდა, მაყურებლების დიდი ნაწილი სიცოცხლის დაზღვევას ჯონ სნოუს ურჩევდა, მაგრამ ჩნდება კითხვა: საერთოდ სჭირდება თუ არა მას სიცოცხლის დაზღვევა? ან თუ კიდევ აპირებს გაცოცხლებას, რომელიმე სადაზღვევო კომპანია აიღებს თუ არა საკუთარ თავზე მასთან თანამშრომლობას.

უხერხულობა შეიქმნება მაშინაც, თუ ღამის მეფე გადაწყვეტს სიცოცხლის დაზღვევას და მას მიმღებში ზრდილობიანი თანამშრომელი განუცხადებს, რომ უკვე გარდაცვლილია.

2. სამოგზაურო დაზღვევა - არია სტარკი

ფიქრობთ, რომ ყველაზე ცუდი რამ, რაც მოგზაურობისას შეიძლება დაგემართოთ, ბარგის დაკარგვაა?! აბა ვესტეროსის შვიდ სამეფოში მოგზაურობა სცადეთ.

სამოგზაურო დაზღვევა ყველაზე მეტად არია სტარკს გამოადგებოდა, თუმცა რთულია იმის თქმა, სახეების შეცვლისას უცვლელი რჩება თუ არა შენი სადაზღვევო პოლისი.

3. ტრანსპორტის დაზღვევა - დეინერის ტარგარიენი

მაგიური ტრანსპორტის დაზღვევა დეინერის ქარიშხალშობილ ტარგარიენს ცხოვრებას ოდნავ მაინც შეუმსუბუქებდა. პრინციპში, როცა შენი და ყველა ცოცხალი ადამიანის კეთილდღეობა სამ დრაკონზეა დამოკიდებული, სჯობს, ამ სამი თანაშემწიდან ერთ-ერთი მკვდრების არმიას ხელისგულზე არ მიართვა. მაგრამ თუ ეს გარდაუვალია, მაშინ ტრანსპორტი დაზღვეული მაინც გყავდეს, რათა მიღებული ანაზღაურებით სხვა დრაკონებს ყოველდღიური საკვები: ცხვრები და გოჭები უყიდო.

4. ქონების დაზღვევა

სიცოცხლის დაზღვევის შემდეგ ქონების დაზღვევა ვესტეროსში ყველაზე პოპულარული იქნებოდა. მაგალითად, კედელს ერთობლივი ძალისხმევით დააზღვევდნენ ღამის გუშაგები და ველურები.

დრაკონზე ამხედრებული ღამის მეფის მიერ კედლის დანგრევის შემდეგ, აღარავის გაუკვირდება, თუ ნელ-ნელა მთელი ვესტეროსის განადგურების მომსწრე გავხდებით. წესით, ჩრდილოეთის საზღვართან მდებარე ციხესიმაგრეების დაზღვევა უფრო ძვირი უნდა ღირდეს, ვიდრე ესოსში მდებარე აგარაკის, ხოლო ვინტერფელის შემთხვევაში საფრთხეებს: ცუდ ამინდს, ხანძარს, მეხსა და უბედურებას, სერსეისგან დაზღვევაც უნდა დაემატოს.

აქვე კიდევ რამდენიმე საინტერესო და სპეციფიკური დაზღვევა:

• ჯანმრთელობის დაზღვევა ჯორაჰ მორმონტს გამოადგებოდა - იმ შემთხვევისათვის, თუ გრეი სქეილი ისევ დაუბრუნდება;
• მესამე პირის მიმართ პასუხისმგებლობის დაზღვევა დაგეხმარება მაშინ, თუ შენი დრაკონი შემთხვევით ვინმეს თავლას გადაწვავს;
• და ქორწილის დაზღვევა - თუ იდეალურად დაგეგმილი ქორწილი შენი კი არა, ჯორჯ მარტინის სცენარით წარიმართება.