იქამდე, სანამ მეოცე საუკუნეს სისხლიან კვალს დაატყობდა, ჰიტლერი მხატვრობით იყო გატაცებული. პირველ მსოფლიო ომამდე ვენაში მუშაობდა მუშად და ამავდროულად, საფოსტო ბარათებსა და ნახატებზე მუშაობდა.

ჰიტლერმა ორჯერ სცადა ვენის სახვითი ხელოვნების უნივერსიტეტში ჩაბარება, თუმცა ორჯერვე უარი მიიღო. წიგნში, "ჩემი ბრძოლა", ჰიტლერი წერდა, რომ დღეში საშუალოდ სამ ნახატს მაინც ხატავდა. თუმცა, როგორც ჩანს, მისმა ნახატებმა ვერც დღევანდელი მყიდველებისგან დაიმსახურა ინტერესი.

ვაიდლერის აუქციონის სახლი იმედოვნებდა, რომ აუქციონიდან $51 000-ს მოაგროვებდა, თუმცა, როგორც ჩანს, არ გაუმართლა. აუქციონი გერმანიის ქალაქ ნიურბერგში ჩატარდა, იქ, სადაც მეორე მსოფლიო ომის მთავარი დამნაშავეები გასამართლდნენ.

აუქციონზე ნახატებთან ერთად ნივთებიც გამოიტანეს, რომლებიც ერთ დროს დიქტატორს ეკუთვნოდა: ვაზა და სვასტიკის ნიშნით ამოტვიფრული სკამი.

სვასტიკის სკამმა, რომელიც ადოლფ ჰიტლერს ეკუთვნოდა, მყიდველებისგან ინტერესი ვერ დაიმსახურა

ფოტო: AFP

ნაცისტურ სიმბოლოთა საჯაროდ გამოჩენა გერმანიის კანონმდებლობით აკრძალულია, გარდა იმ შემთხვევებისა, როცა სიმბოლოები განათლების მიზნით გამოიყენება.

რა პრობლემები დაატყდა თავს აუქციონს?

პოლიციამ აუქციონზე გამოტანილი იმ ნივთების კონფისკაცია მოახდინა, რომელთაც თანდართული ჰქონდათ "AH"-ს ან "A Hitler"-ის სიმბოლოები.

"გამოძიება დაიწყო იმ არაიდენტიფიცირებული პირების მიმართ, რომლებსაც ადანაშაულებენ თაღლითობასა და დოკუმენტების გაყალბებაში", - ამბობს მთავარი პროკურორი ანთიე გაბრიელს-გორსოლკი AFP-სთან. ის ადასტურებს, რომ აუქციონის სახლი თავისივე სურვილით თანამშრომლობს გამოძიებასთან.

დღემდე ნაცისტურ რელიქვიათა გაყიდვა აუქციონზე აზრთა სხვადასხვაობას იწვევს. ზოგი მათ ისტორიული მიზნით ყიდულობს. თუმცა ისევ არსებობს სხვადასხვა ჯგუფი, რომელიც მხოლოდ ნაცისტური რეჟიმის გაიდეალების გამო იძენს ჰიტლერის ნივთებს.

ჰიტლერის დიქტატურის დროს, ნაცისტურმა გერმანიამ მეორე მსოფლიო ომი დაიწყო. მისი თაოსნობით გატარდა გენოციდის პოლიტიკა, რამაც 6 მილიონი ებრაელის, 10 მილიონი მოქალაქისა და ჯარისკაცის სიკვდილი გამოიწვია.