ფოტოგრაფი ბელა ფოქსველი ლონდონში იმ სილამაზეს აფიქსირებს, რომელსაც უამრავი ადამიანი უბრალოდ გვერდს უვლის — კარებს.

სწორედ ამ ინტერესზე აქვს მორგებული ინსტაგრამიც — The Doors of London. აქ შეხვდებით სხვადასხვა ფერის, ფორმის, ზომისა თუ გაფორმების მქონე კარს და ყველა მათგანის ესთეტიკა უეს ანდერსონის ფილმში გაგრძნობინებთ თავს.

მართლაც, როგორ შეიძლება ამდენი საოცარი კარი მხოლოდ ერთ ქალაქში იყოს? ამ ყველაფრის უკან ბელას დაკვირვებული თვალი და ორ-ნახევარი წელი დგას:

"ეს ჩემთვის თავიდან გამოწვევასავით იყო. მანამდე სხვა ბრენდებისთვის ვმუშაობდი და ვიღებდი სურათებს და გადავწყვიტე რაღაც ჩემთვისაც შემექმნა. ახლა უკვე წარმოუდგენელია კარს დაუკვირვებლად ჩავუარო. ასე მგონია, ჩემი ნიშა ვიპოვე".

ფოტოგრაფის თქმით, თითოეული კარი მის პატრონზე ბევრს ამბობს:

"ვგიჟდები იმ ადამიანებზე, რომლებიც თავის შესასვლელ კარს ასე ალამაზებენ. ძალიან გამბედავი და ექსტრავაგანტული გაფორმებები მხვდება. კარი სიმბოლურია, ეს გამოხატავს ახალ შესაძლებლობებს, ეს პატრონს ახსენებს საკუთარ ადგილსა და სახლს. მათში ბევრი განსაკუთრებულობა იმალება".

დაათვალიერეთ ლონდონის რაიონებში, ბრიქსტონსა და ნოტინგ-ჰილში გადაღებული სურათები და თუ მეტის ნახვა მოგინდებათ, ბელას ინსტაგრამს ეწვიეთ, სადაც მას უკვე თითქმის 50 ათასი გამომწერი ჰყავს.