Breaking Bad-ის ფანებისთვის დიდებული ახალი ამბავი გვაქვს! როგორც უკვე იცით, AMC-ის ერთ-ერთი ყველაზე წარმატებული და პოპულარული სერიალის, Breaking Bad-ის ფილმზე მუშაობა მალე დაიწყება. ამ ფილმში კი შესაძლოა კვლავ ვიხილოთ შეუდარებელი დუეტი ბრაიან კრენსტონისა და აარონ პოლის მონაწილეობით,

დიახ, დიდი ალბათობით ფილმში კვლავ გამოჩნდებიან უოლტერ უაითი და ჯესი პინკმენი.

თუმცა, ეს ყველაფერი არ არის, თუ ჭორებს დავუჯერებთ, ამ არაჩვეულებრივ დუეტთან ერთად ფილმში სერიალის სხვა მსახიობებსაც ვიხილავთ, მათ შორის კრისტინ რიტერს, ჯონათან ბენკსს, ჩარლზ ბეიკერსა და სხვებს.

ყველაფერი მას შემდეგ გაირკვა, რაც ბრაიანმა ერთ-ერთ ინტერვიუში ფილმზე და მასზე მუშაობის პროცესზე მინიშნებები გააკეთა. მაგალითად, თქვა, რომ სცენარი ჯერ არ წაუკითხავს, თუმცა უოლტერის როლის კიდევ ერთხელ შესასრულებლად მზად არის.

"სცენარი ჯერ არ წამიკითხავს, თუმცა დიდი სიამოვნებით ვნახავდი უოლტერს ფილმში. ძალიან მინდა, რომ ეს როლი კიდევ ერთხელ შევასრულო და ვინს გილიგანთან კვლავ ვითანამშრომლო, ის გენიოსია", - ამბობს ინტერვიუში ბრაიანი.

ამ ეტაპზე უცნობია, როგორ გამოჩნდებიან კრენსტონისა და პოლის პერსონაჟები ფილმში.

როგორც ცნობილია სურათზე Sony Pictures იმუშავებს, პროექტის სავარაუდო ქრონომეტრაჟი კი ორი საათი იქნება.

წინასწარი ინფორმაციით, გადაღებები ნოემბრის შუა რიცხვებში დაიწყება და 2020 წლის თებერვლის ჩათვლით გაგრძელდება.

ეს პირველი შემთხვევა არ არის როდესაც წარმატებულ სერიალზე ფილმს იღებენ. მაგალითად, სულ მალე მაყურებელი HBO-ს საკულტო შოუს, სოპრანოს კლანის პრიქველსაც ფილმის სახით იხილავს.

Breaking Bad ყველა დროის ერთ-ერთ საუკეთესო სერიალად არის აღიარებული. მიღებული აქვს არაერთი ჯილდო, მათ შორის 16 ემი, ორი ოქროს გლობუსი და ოთხი ტელევიზიის კრიტიკოსების ჯილდო.