კალიფორნიაში, ქალაქ ტორანსის კათოლიკურ სკოლაში მომუშავე ორმა მონაზონმა ლას-ვეგასში წასასვლელად და აზარტული თამაშების სათამაშოდ სკოლის ბიუჯეტიდან არც მეტი, არც ნაკლები $500 ათასი მოიპარა.

აღსანიშნავია, რომ მარგარეტ კრიპერი 28 წლის განმავლობაში ამავე სკოლის დირექტორი იყო, ლანა ჩენგი კი 20 წლის მანძილზე აქ მასწავლებლის პოზიციას იკავებდა.

წმინდა ჯეიმსის კათოლიკურ ეკლესიაში ამბობენ, რომ მიუხედავად იმისა, რომ მონაზვნები ნანობენ და აღიარებენ საკუთარ დანაშაულს, სკოლიდან ორივე მათგანი გაათავისუფლეს.

პარალელურად კი გრძელდება გამოძიება და სასწავლებელში დიდი რაოდენობით ფულის გაფლანგვის ფაქტს ადგილობრივი აუდიტის სამსახური იკვლევს - სავარაუდოდ, ძალიან მალე დადგინდება, სკოლაში სწავლისთვის გადახდილი თანხები მუდმივად იფლანგებოდა, თუ ეს პირველი შემთხვევა იყო.