ქუთაისის პარლამენტის შენობის წინ მოქალაქეები აქციას მართავენ, საკანონმდებლო ორგანოს ქუთაისში დატოვების მოთხოვნით. ადგილზე მისულ მონაწილეებს უჭირავთ ბანერები წარწერით, "დატოვე პარლამენტი ქუთაისში", "ჩვენი მომავალი აქ არის".

აქციის ერთ-ერთი ორგანიზატორი, ხვიჩა ვაშაყმაძე რადიო თავისუფლებასთან საუბარში ამბობს, რომ აქციის მიზანია ხელისუფლებას უთხრან, რომ შეცდომას უშვებენ:

"ქუთაისისთვის [საპარლამენტო] სტატუსის ჩამორთმევა ნიშნავს ქალაქის განვითარების შეჩერებას. ხელისუფლებამ ეს არ უნდა დაუშვას. ხელისუფლებამ არ უნდა იზრუნოს საკუთარ კომფორტზე, ხელისუფლებამ უნდა იზრუნოს ქალაქების თანაბრად განვითარებაზე. ქუთაისიდან პარლამენტის თბილისში გადატანა ნიშნავს იმას, რომ მოსახლეობის დიდი ნაწილი დატოვებს ქალაქს და გადაბარგდება თბილისში".

ფოტო: On.ge

საკანონმდებლო ორგანოს ქუთაისიდან თბილისში სრულად გადატა იგეგმება. შენობის შინაგან საქმეთა სამინისტროსთვის გადაცემის შემდეგ, უწყება აღნიშნულ შენობაში პოლიციის რეგიონული ცენტრის განთავსებას გეგმავს. საპროცედურო საკითხთა კომიტეტის თავმჯდომარის, გიორგი კახიანის თქმით, ახლა მხოლოდ კანონპროექტი არსებობს და პარლამენტი ქუთაისიდან თბილისში მას შემდეგ გადავა, როცა მას მიიღებენ.

პარლამენტის ვიცე-სპიკერის, თამარ ჩუგოშვილის თქმით, გართულებულია პარლამენტის მუშაობა ორ შენობაში და მისივე განცხადებით, ეს პარლამენტს, როგორც ინსტიტუციას ძალიან აზიანებს:

"ძალიან დიდ ხარჯებთანაა დაკავშირებული, ბიუჯეტიდან იხარჯება ეს თანხები".