ბიტლსი ელვის პრესლის მხოლოდ ერთხელ, 1965 წელს, შეხვდა, როდესაც ამერიკაში ტურნეზე წასული ჯგუფი როკენ-როლის მეფემ ლოს-ანჯელესში მდებარე საკუთარ სახლში მიიწვია.

"ელვისთან შეხვედრა ახდენილი ოცნებასავით იყო. ჩვენ მასთან შეხვედრაზე თინეიჯერობიდან ვოცნებობდით და ეს ახდა. დიდებული მომენტი იყო", - ამბობს მაკარტნი.

როგორც პოლი იხსენებს, ელვისმა მათ საკუთარი გიტარები აჩვენა და მათზე ერთად დაუკრეს, თუმცა მას ყველაზე მეტად ტელევიზორის დისტანციური გადამრთველი დაამახსოვრდა:

"თუმცა, ყველაფერზე მეტად რამაც გაგვაოცა ის იყო, რომ მას ჰქონდა ტელევიზორის პირველი დისტანციური გადამრთველი, რომელიც ჩვენ ვნახეთ. ეს სწორედ ის წელი იყო, როცა ისინი გამოუშვეს".

პოლ მაკარტნი ყვება, რომ ელვისი ტელევიზორში არხებს პულტის საშუალებით ცვლიდა და ისინი გაოცებულები იყვნენ.

"ვფიქრობდით: 'ის ყოვლისშემძლე ღმერთია. მას შეუძლია ტელევიზორი ისე გადართოს, რომ მასთან არც კი მივიდეს'", - იხსენებს პოლი.

ტელევიზორის პირველი დისტანციური გადამრთველი 1955 წელს გამოვიდა, თუმცა ის ადვილად ხელმისაწვდომი არ იყო. 1979 წელს ის ამერიკელების მხოლოდ 19%-ს ჰქონდა.