სოფელ ხელთუბნის მიმდებარე ტერიტორიაზე გარდაცვლილი თორნიკე მერაბაშვილის მამა პრემიერ-მინისტრთან, მამუკა ბახტაძესთან და შინაგან საქმეთა მინისტრთან, გიორგი გახარიასთან შეხვედრას ითხოვს. ის ამბობს, რომ მისი შვილი მოკლეს და შსს გამოძიებას უბედური შემთხვევის მუხლით აწარმოებს.

"შემხვდნენ, რომ დაველაპარაკო და ავუხსნა ყველაფერი. დასაკარგი აღარაფერი მაქვს, მე შვილი დავკარგე", - ამბობს გარდაცვლილის მამა.

სოფელ ხელთუბნის მოსახლეობა და გარდაცვლილის ოჯახის წევრები გორის მერიასთან აქციას მართავენ. ოჯახთან ერთად იმყოფება ზაზა სარალიძე და მალხაზ მაჩალიკაშვილიც.

მანამდე აქციის მონაწილეებს თბილისი-სენაკი-ლესელიძის ცენტრალური მაგისტრალი ჰქონდათ გადაკეტილი, თუმცა გარდაცვლილის მამამ მოუწოდებით გზა გაიხსნა და აქციამ მერიასთან გადაინაცვლა.

მერებაშვილის გარდაცვალების საქმეზე გამოძიება თავდაპირველად სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

როგორც On.ge-ს შინაგან საქმეთა სამინისტროში განუცხადეს გამოძიება 117-ე და 276-ე მუხლის მე-7 ნაწილით მიმდინარეობს. მუხლები ჯანმრთელობის განზრახ მძიმე დაზიანებას და ტრანსპორტის უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია. უწყებაში ამბობენ, იმისთვის რომ კონკრეტული მიმართულება გამოიკვეთოს ჩანიშნულია ექსპერტიზა და მიმდინარეობს საგამოძიებო მოქმედებები