სიღნაღის მუნიციპალიტეტის სოციალურად დაუცველ ოჯახებზე ერთჯერადი სოციალური დახმარების გაცემის კომისიის მდივანი თაღლითობის ბრალდებით დააკავეს. ამის შესახებ ინფორმაციას სახელმწიფო უსაფთხოების სამსახური ავრცელებს.

სუს-ის ინფორმაციით, დაკავებულმა სოციალურად დაუცველი პირების მონაცემების გაყალბების გზით, თაღლითურად დაეუფლა აღნიშნულ პირთათვის განკუთვნილ სოციალური დახმარების თანხებს. სუს-ში ამბობენ, რომ დაკავებულმა თაღლითური გზით ჯამში 1450 ლარი მიითვისა.

უწყებაში ასევე ამბობენ, გამოძიებას სახელმწიფო უსაფრთხოების სამსახური აწარმოებს, რომელიც უკვე დაწყებულია საქართველოს სისხლის სამართლის კოდექსის 19-180-ე მუხლის მე-2 ნაწილის "ბ" და მე-3 ნაწილის "ა" ქვეპუნქტით, 180-ე მუხლის მე-2 ნაწილის "ბ" და მე-3 ნაწილის "ა" ქვეპუნქტით და 341-ე მუხლით. აღნიშნული დანაშაული ითვალისწინებს თავისუფლების აღკვეთას 6-დან 9 წლამდე ვადით.