მოსკოვის დომოდედოვოს აეროპორტში პოლიციის თანამშრომელმა ძალის გამოყენებით ერთ-ერთი მგზავრი მისი ცოლისა და შვილის თანდასწრებით დააკავა. შემთხვევა 19 აგვისტოს მოხდა. წინასწარი ინფორმაციით ცოლ-ქმარი ნასვამ მდგომარეობაში იყო.

გავრცელებულ ვიდეოში ჩანს, როგორ სცემს პოლიციელი დაკავებულ კაცს. არასრულწლოვანი შვილი კი მამის დასახმარებლად პოლიციის თანამშრომელს ჩანთას ესვრის. ამავე დროს, ქალი სხვა პოლიციელს ჰყავს დაკავებული. როგორც ვიდეოში ჩანს, კაცი პოლიციელს წინააღმდეგობას არ უწევს.

რუსული გამოცემა Ria-ს ინფორმაციის, საგამოძიებო კომიტეტი გამოიძიებს როგორც პოლიციელის მხრიდან ძალის გადამეტებას, ასევე, სამართალდამცავების მიმართ შეურაცხყოფასა და ძალადობას.

როგორც ცნობილია, დაკავებულ მგზავრს წვრილმანი ხულიგნობისთვისა და პოლიციის დაუმორჩილებლობისთვის ოქმი შეუდგინეს.