არიზონის შტატში, ქალაქ მესაში მდებარე საავადმყოფოში ხუმრობენ, რომ შენობაში ორსულობა გავრცელდა, რადგან დაწესებულებაში ერთდროულად 16 ექთანია ორსულად.

ორსული ექთნები თანამშრომლების 10%-ს შეადგენენ და პაციენტებს მათი სიმრავლის შემჩნევა არ გასჭირვებიათ.

საავადმყოფოს მიერ გამართულ კონფერენციაზე, ერთ-ერთმა ქალმა იხუმრა, რომ ეს სავარაუდოდ წყალში არსებული მინარევების ბრალი იყო, ან უბრალოდ შეთქმულება, რომ საშობაო არდადეგები ყველას ერთად აეღო.

პირველი მშობიარობა სექტემბერშია დაგეგმილი, ბოლოს კი იანვარში ელიან.

"მანამ, სანამ ფეისბუქზე ჯგუფი არ გავაკეთეთ, ვერც კი ვამჩნევდით, რამდენი ჩვენგანი იყო ორსულად. თითქოს ეს წინასწარ დაგეგმილი იყო", - თქვა ერთ-ერთმა ორსულმა.

ექთნები მადლობას უხდიან იმ თანამშრომლებს, რომლებიც ორსულად არ არიან, რადგან ახლა საქმის დიდი ნაწილის შესრულება მათ უწევთ. 16-ვე თანამშრომელს ტუბერკულოზითა და ჰერპესით დაავადებული პაციენტების მკურნალობაში მონაწილეობა ეკრძალებათ. მათივე უსაფრთხოებისთვის, სიმსივნით დაავადებული პაციენტების თერაპიების პროცედურაში ჩართვა არასასურველია.

თანამშრომლები საერთო წვეულებას გადაიხდიან, შემდეგ კი, 12-კვირიან დეკრეტულ შვებულებებს აიღებენ.