ჟურნალ Vogue-თან მიცემულ ინტერვიუში ამერიკელი მომღერალი ბიონსე ყვება, რა რეაქცია ჰქონდა, როცა შეიტყო, რომ მისი წინაპრები მონათმფლობელები იყვნენ.

მომღერალი თავისი ნათესავების წარსულს იკვლევდა, როდესაც გაარკვია, რომ მის მონათმფლობელ წინაპარს მონა შეუყვარდა, მასზე დაქორწინდა და ის სწორედ მათი შთამომავალია:

"დიდი დროის განმავლობაში ვცდილობდი გონებაში გადამემუშავებინა ეს საიდუმლო. მე მაინტერესებდა, რას ნიშნავდა ეს და ვცდილობდი, ამის რეალობაში წარმოდგენას. ახლა მჯერა, რომ ამის გამო დამაჯილდოვა ღმერთმა ტყუპებით. ქალისა და კაცის ეს ენერგია ჩემს სისხლში იზრდებოდა. ვლოცულობ, რომ ჩემი თაობების წყევლა ჩემი ოჯახით დავამარცხო და ჩემს შვილებს ნაკლებად რთული ცხოვრება ჰქონდეთ".

ბიონსეს სიტყვებით, თავის ოჯახსა და წინაპრებს შორის კავშირი მას დაეხმარა:

"ჩემი მემკვიდრეობითი ხაზის წარმომადგენლებს, ქალსა და კაცს, რთული ურთიერთობა ჰქონდათ, ის აგებული იყო ძალაუფლების ბოროტად გამოყენებასა და უნდობლობაზე. წარსული დამეხმარა, რომ ჩემი ურთიერთობა ამ კონფლიქტისგან დამეცვა. წარსულთან კავშირი და შენი ისტორიის ცოდნა ერთდროულად დაუცველსა და ლამაზს გხდის".

ბიონსემ ასევე თქვა, რომ On The Run II ტურნეს ფარგლებში მან და ჯეი-ზიმ ბერლინში იმ ადგილას გამართეს კონცერტი, სადაც წარსულში სიძულვილსა და რასიზმს ავრცელებდნენ. მომღერლის თქმით, ამით ისინი წარსულში არსებულ უსამართლობასა და ბოროტებას დაუპირისპირდნენ.