ფეისბუქი და ინსტაგრამი საშუალებას მოგცემენ, თავად განსაზღვროთ, მაქსიმუმ რა დროის გატარება გსურთ სქროლვაში. პლატფორმებს სტატისტიკის პანელი დაემატება, სადაც ნახავთ, რა დრო დაუთმეთ გასულ კვირაში სოციალურ მედიას. იქვე შეგიძლიათ მიუთითოთ ოპტიმალური ყოველდღიური დრო, რომლის ამოწურვის შემდეგაც, შეტყობინებას მიიღებთ. ამის შემდეგ კი თავად გადაწყვეტთ, გააგრძელოთ თუ არა აქტიურობა.

ახალი ფუნქციები ადამიანების სოციალურ მედია პლატფორმებზე მიჯაჭვულობასთან საბრძოლველად შეიქმნა.

ეს ფუნქციები რამდენიმე კვირაში მთელი მსოფლიოს მასშტაბით იქნება ხელმისაწვდომი. ახალ ფუნქციებს ფეისბუქის აპლიკაციის მენიუში იპოვნით, რომელიც მარჯვენა კუთხეშია განთავსებული. ინსტაგრამში კი დროის მაკონტროლებელი ფუნქციის ჩართვა პარამეტრების მენიუდან იქნება შესაძლებელი.

ფოტო: The Verge

ახალი პანელის მეშვეობით ნახავთ, თუ რა დრო გაატარეთ ფეისბუქზე ბოლო 7 დღის განმავლობაში და აქვე შეგეძლებათ თქვენს თავს აპლიკაციის გამოყენების ლიმიტი დაუწესოთ. შეძლებთ ასევე გათიშოთ შეტყობინებები რამდენიმე საათით.

ბოლო დროს ფეისბუქი კრიტიკის ქარცეცხლში გაეხვია იმის გამო, რომ მომხმარებლების ყურადღების მისაპყრობად აგრესიული ხერხების გამოყენებასაც არ ერიდება

დეკემბერში კომპანიამ აღიარა, რომ ფეისბუქის კედლის ხშირ თვალიერებას ადამიანებზე უარყოფითი გავლენა აქვს. გუგლმა და Apple-მა კი ოპერაციულ სისტემებს დროის მთვლელი დაამატეს, რომელიც თითოეულ აპლიკაციზე დახარჯულ დროს ზომავს.

ინსტაგრამის გუნდის წევრი, ამეტ რანადივე ამბობს, რომ საჭიროა, ადამიანებს მეტი კონტროლი ჰქონდეთ სოციალურ მედიაში გატარებულ დროზე, თუნდაც ეს კომპანიებისთვის საზიანო იყოს.

"ეს შეიძლება კომპანიისგან გარკვეულ კომპრომისებზე წასვლას მოითხოვდეს, მაგრამ ვთვლით, რომ ეს საკითხი მომხმარებლებისთვის ძალიან მნიშვნელოვანია და ჩვენ ამ მიმართულებით მუშაობას მომავალშიც გავაგრძელებთ", - აღნიშნა ამეტ რანადივემ.