18 ივლისს Recode-თან ინტერვიუში ფეისბუქის დამფუძნებელმა მარკ ცუკერბერგმა სოციალური ქსელის რეპორტ-პოლიტიკაზე დაწვრილებით ისაუბრა და შეთქმულების თეორიებთან დაკავშირებით საკუთარი პოზიცია ღიად დააფიქსირა.

ჟურნალისტმა სცადა გაერკვია, სად ავლებს ზღვარს ინტერნეტ-გიგანტი ყალბ სიახლესა და სუბიექტურ პოზიციას შორის.

2017 წლის აპრილში გამოცემა Infowars-მა გამოაქვეყნა ვიდეო, რომელშიც ჟურნალისტი ალექს ჯოუნსი სენდი ჰუკის სკოლაში მომხდარ შეიარაღებულ თავდასხმას, რომელსაც 20 ბავშვი და 6 ზრდასრული ემსხვერპლა, დადგმულს უწოდებდა.

ინტერვიუერმა მარკ ცუკერბერგს ჰკითხა, რატომ არ წაიშალა ფეისბუქიდან Infowars-ის გვერდი, რომელსაც იმ მომენტში 900 000-ზე მეტი გამომწერი ჰყავდა:

"სენდი ჰუკი არ მომხდარა" განხილვის საგანიც კი არ შეიძლება იყოს. ეს სიცრუეა. შეგიძლიათ, რომ ბოლოს და ბოლოს, წაშალოთ თქვენი პლატფორმიდან ეს ინფორმაცია?", - იკითხა კარა სვიშერმა.

"მე გეთანხმებით, რომ ეს ტყუილია. ვფიქრობ, რომ ამ ტრაგედიის მოწმესთან მისვლა და იმის თქმა, რომ ცრუობს - შეურაცხყოფაა. ამას აუცილებლად წავშლიდით, მაგრამ მინდა, უკეთ აგიხსნათ.

როგორც იცით, მე ებრაელი ვარ და არსებობს ადამიანთა ჯგუფი, რომელიც უარყოფს, რომ ჰოლოკოსტი მოხდა. ჩემთვის ეს საშინლად შეურაცხმყოფელია, მაგრამ მიუხედავად ამისა, ჩვენი პლატფორმა არ წაშლიდა პოსტს, რომელსაც ჰოლოკოსტის სინამდვილეში ეჭვი შეაქვს. განსხვავებული მოვლენები ადამიანებს განსხვავებულად ესმით. ეს არ ნიშნავს, რომ ისინი განზრახ ამბობენ ასე. ხანდახან ძალიან რთულია ჩვენი მომხმარებლების სიტყვებს მიღმა მათი მიზნების დანახვა, მაგრამ ფეისბუქი იმ შემთხვევაშიც კი აძლევს ადამიანებს თავისუფლებას, როცა მათ სხვები არ ეთანხმებიან ან მათი აზრი შეურაცხმყოფლად მიაჩნიათ. ჩვენ ყველაფერს ვაკეთებთ იმისთვის, რომ თქვენს ნიუსფიდებში ყალბი სიახლეები თუ კონსპირაციული თეორიები მინიმუმამდე დავიყვანოთ", - თქვა მარკ ცუკერბერგმა.

მოგვიანებით ფეისბუქის დამფუძნებელს საკუთარი სიტყვების დამატებით განმარტებაც მოუხდა:

"ჩვენი ბრძოლა ყალბ სიახლეებთან არ ნიშნავს იმას, რომ ჩვენს ქსელში ამიერიდან მხოლოდ უტყუარ ფაქტებს წაიკითხავთ. ვცდილობთ, შევაჩეროთ მიზანმიმართული დეზინფორმაცია, რომელსაც ფაქტების შემმოწმებლები სიყალბედ მონიშნავენ. თუ პოსტი ძალადობის ან სიძულვილისკენ მოუწოდებს მომხმარებლებს, ის აუცილებლად წაიშლება, სხვა შემთხვევაში კი ვეცდებით, გავრცელება შევუზღუდოთ. შეურაცხმყოფელ სიტყვებთან ბრძოლის საუკეთესო მეთოდი კარგი სიტყვების სიმრავლეა".

როგორც ხვდებით, ფეისბუქი თავისთავად იმ ფაქტს, რომ ინფორმაცია მცდარია ან გადამოწმებას საჭიროებს, წესების დარღვევად არ აღიქვამს.

იმავეს ადასტურებს ჯონ ჰეჯმენიც, რომელიც News Feed-ის აღმასრულებელი დირექტორია:

"ჩვენთვის ფუნდამენტური საკითხია, რომ ფეისბუქი იყოს ადგილი, სადაც განსხვავებული შეხედულებების მქონე ადამიანებს ხმა აქვთ და განსხვავებულ გამოცემებს საკითხის საკუთარი ხედვა გააჩნიათ".

ცოტა ხნის წინ ფეისბუქმა 12-წუთიანი მოკლემეტრაჟიანი ფილმი Facing Facts გამოუშვა, რომელშიც ყალბ ნიუსებთან დაკავშირებით კომპანიის პოლიტიკა დეტალურადაა განხილული.