ტერაბანკი ტექნოლოგიებში გოგოების ჩართულობის მხარდაჭერას აგრძელებს. ყოველწლიური გლობალური ღონისძიების, Women Techmakers-ის ერთ-ერთი მონაწილე, მეთერთმეტე კლასელი მარიამ ლომთაძე, მასაჩუსეტსის ტექნოლოგიების ინსტიტუტში მეწარმეებისთვის განკუთვნილ, საერთაშორისო საზაფხულო პროგრამა LaunchX-ს გაივლის.

მარიამ ლომთაძემ ერთთვიან პროგრამაზე გრანტის მოსაპოვებლად საკმაოდ რთულ კონკურსში გაიმარჯვა. წარმატებული შედეგებით იგი მასაჩუსეტსის ტექნოლოგიების ინსტიტუტში მოხვდა, სადაც კონკურენცია ყველაზე მაღალი იყო. პროგრამის 80 მონაწილეს შორის საქართველოს ერთადერთი წარმომადგენელი წელს სწორედ მარიამი იქნება. ტერაბანკის მის საყოფაცხოვრებო ხარჯებს სრულად დაფარავს.

"ამ პროგრამაში მონაწილეობით იმ განათლების მიღების საშუალება მეძლევა, რომელზეც მთელი ცხოვრება ვოცნებობდი. ეს არის შესაძლებლობა, შევხვდე უამრავ საინტერესო ადამიანს, გავიზიარო მათი გამოცდილება და მოვისმინო ბევრი სასარგებლო რჩევა. მიღებული ცოდნის სწორად გამოყენება კი ჩემი სტარტაპების განვითარებასა და სწავლის გაგრძელებაში დამეხმარება. ამავდროულად, ძალიან მინდა, ეს ცოდნა ჩემ ირგვლივ მყოფებსაც გავუზიარო და საქართველოში სტარტაპერი გოგოების რაოდენობის გაზრდას ხელი შევუწყო. ტერაბანკი ოცნების ახდენაში დამეხმარა. ვაფასებ მხარდაჭერას, რომელსაც მისი გუნდი არა მარტო ჩემ მიმართ, არამედ ზოგადად ტექნოლოგიებში გოგოების ჩართულობის მიმართ იჩენს“, - ამბობს მარიამ ლომთაძე.

LaunchX-ის საერთაშორისო საზაფხულო პროგრამა მეწარმეებისთვისაა განკუთვნილი. მის მონაწილეებს ერთი თვის განმავლობაში ლექციებს მასაჩუსეტსის, ჰარვარდისა და სხვა ცნობილი უნივერსიტეტების ლექტორები უკითხავენ. პროგრამის მნიშვნელოვანი ნაწილი მონაწილეთა ჯგუფებად დაყოფასა და სტარტაპის წამოწყებას მოიაზრებს. ჯგუფის წევრებმა ინოვაციური იდეის მოფიქრების შემდეგ ინვესტორი უნდა მოძებნონ, პროტოტიპი შექმნან და ბოლოს პრეზენტაციაც ჩაატარონ. აღსანიშნავია, რომ მონაწილეთა უმეტესობა პროექტის დასრულების შემდეგ სტარტაპზე მუშაობას აქტიურად აგრძელებს.

მარიამისა და ტერაბანკის დაკავშირება მიმდინარე წელს, საერთაშორისო პროექტის, Women Techmakers-ისადმი მიძღვნილ ღონისძიებაზე მოხდა, რომელიც საქართველოში 11-13 მაისს, თბილისის Google-ის დეველოპერების ორგანიზებითა და ტერაბანკის პარტნიორობით ჩატარდა. მარიამი ამ ღონისძიების ერთ-ერთი მონაწილე იყო. Women Techmakers კომპანია Google-ის მიერ წამოწყებული გლობალური ინიციატივაა. იგი მთელი მსოფლიოს მასშტაბით STEM სფეროში ქალებისა და გოგოების ჩართულობას, მათი მონაწილეობის წახალისებას, წარმატებული მაგალითების ჩვენებას, ქალ და კაც დეველოპერებს შორის ინტეგრაციას, რესურსების გაზიარებასა და თანამშრომლობას ისახავს მიზნად. საქართველოში იგი პირველად 2013 წელს გაიმართა და მას შემდეგ რეგულარულად ტარდება. ინიციატივის პარტნიორთა სიას ტერაბანკი წელს პირველად შეურთდა.