ხობის მუნიციპალიტეტში, სავარაუდოდ, 60 მილიონი წლის წინ გადაშენებული ზღვის ცხოველების ნიმუშები აღმოაჩინეს. ინფორმაცია ამის შესახებ ხობის მუნიციპალიტეტის მაჟორიტარმა, ირაკლი ბერაიამ გაავრცელა. დეპუტატი ფეისბუქზე აქვეყნებს დოკუმენტს, რომელზე დაყრდნობითაც ამ სავარაუდო აღმოჩენაზე საუბრობს.

საქართველოს ალექსანდრე ჯავახიშვილის სახელობის გეოგრაფიული საზოგადოების ვიცე-პრეზიდენტის, ზურაბ ჯანელიძის წინასწარ დაკვირვებაში წერია, რომ მდინარე ხობისწყლის კალაპოტის გასწვრივ მიმობნეული გეოლოგიური წარმონაქმნები კირქვიანი კონკრეციებია, რომელიც მდინარის დინების მიერაა დამუშავებული.

ფოტო: ირაკლი ბერაია / Facebook

"ასეთი ფორმისა და სიდიდის ნიმუშები დიდ იშვიათობას წარმოადგენენ მათი პარამეტრების გამო და უპირველეს ყოვლისა ამით იწვევენ ინტერესს. აგრეთვე აღსანიშნავია, რომ ეს ნიმუშები გვანან დიდი ხნის წინათ გადაშენებულ ზღვის ცხოველებს ე.წ. ამონიტებს, რომლებიც ცარცული პერიოდის დასასრულამდე ბინადრობდნენ (დაახლოებით 60 მილიონი წლის წინათ)", - წერს ზურაბ ჯანელიძე.

დოკუმენტში აღნიშნულია, რომ ამონიტების ნიჟარების დიამეტრის მაქსიმალური სიგრძე ორ მეტრამდე აღწევდა. აქედან გამომდინარე, აღმოჩენილი წარმონაქმნების ფორმათა სიდიდე შეიძლება იყოს მათი ამონიტებისადმი მიკუთვნების ერთ-ერთი მიზეზი.

როგორც ჯანელიძემ On.ge-ს უთხრა, საქართველოში დიდი ზომის ამონიტები აქამდეც აღმოუჩენიათ, მაგრამ ამ სიდიდის არასდროს. თვითონ ჯანელიძეს მიაჩნია, რომ აღმოჩენილი წარმონაქმნები ამონიტები არაა, თუმცა ზომიდან გამომდინარე ჰგავს.

გეორგაფიული საზოგადოების ვიცე-პრეზიდენტის თქმით, საბოლოო დასკვნისთვის ნიმუშები პროფესიონალმა პალეონთოლოგებმა და ლითოლოგებმა უნდა შეისწავლონ. მისივე განმარტებით, იმ შემთხვევაშიც თუ ნიმუშები გადაშენებულ ამონიტებთან კავშირში არ არიან, პარამეტრების გამო მათ დიდი მნიშვნელობა აქვთ. ჯანელიძის პოზიციით, ნგრევისა და განადგურებისგან დასაცავად წარმონაქმნები შესაბამის ადგილზე უნდა გადაიტანონ.

ხობის მერმა, გოჩა ქაჯაიამ On.ge-ს უთხრა, რომ წარმონაქმნებისათვის დამატებითი ექსპერტიზის ჩატარება იგეგმება.

ფოტო: ირაკლი ბერაია / Facebook