პრემიერ-მინისტრობის კანდიდატის, მამუკა ბახტაძის თქმით, მცირე მთავრობის კონცეფცია მხოლოდ სამინისტროების რაოდენობის შემცირებას არ გულისხმობს. მისი თქმით, არსებული 14 სამინისტროს 11-მდე შემცირებით 120 მილიონ ლარამდე გათავისუფლდება.

"მცირე მთავრობის კონცეფცია გულისხმობს მთავრობის ზომის შემცირებას ეკონომიკასთან მიმართებაში ისე, რომ ის არ აღემატებოდეს 3,9 %-ს. თანხაში ეს ნიშნავს, რომ ჩვენ მომავალში საშუალება მოგვეცემა საკმაოდ მნიშვნელოვანი თანხა, როგორიც არის 100-120 მილიონის ფარგლებში მივმართოთ სხვა მნიშვნელოვან სოციალურ პროგრამაზე."

ბახტაძის განმარტებით, სტერეოტიპული დამოკიდებულება იმის შესახებ, რომ მხოლოდ სამინისტროების რაოდენობა შემცირდება არაზუსტია:

"ეს უპირველეს ყოვლისა ნიშნავს ეკონომიკაში ხარჯების წილს. შესაბამისად ჩვენი პროგრამის ფარგლებში ამას დავაფიქსირებთ თუ რა უნდა იყოს ის ზედა ზღვარი, რომელიც იქნება ხარჯების ნაწილში გათვალისწინებული."

ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება. მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება.

მთავრობის არსებულ მინისტრთა კაბინეტს მამუკა ბახტაძე ახლა საქართველოს პარლამენტს წარუდგენს განსახილველად. ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. კანონმდებლების თქმით, მთავრობა კვირის ბოლომდე დამტკიცდება.