დიანა ლეიგერმანი ინგლისური ლიტერატურის მასწავლებელია. ის ყოველ წელს ერთსა და იმავე ექსპერიმენტს ატარებს იმისთვის, რომ მისმა მოსწავლეებმა უკეთესად გაიგონ მე-20 საუკუნის ერთ-ერთი უმნიშვნელოვანესი რომანი, 1984. ექსპერიმენტის ფარგლებში დიანა კლასში დროებით დიქტატორულ რეჟიმს ამყარებს და ამით მყარ ნიადაგს ქმნის წიგნის გასაგებად. უფროსკლასელებმა, რა თქმა უნდა, არ იციან, რომ ექსპერიმენტში მონაწილეობენ.

აი, რას წერს დიანა:

"სანამ კლასში 1984-ის სწავლებას შევუდგებოდე, სიმულაციას ვქმნი, რომელსაც "საყოველთაო სიკეთის" სახელით ვფუთავ. თავიდან მოსწავლეებს ვუხსნი, რომ სკოლამ ახალი წესები შემოიღო უფროსკლასელების ინდიფერენტულობის დასამარცხებლად და ვამატებ იმასაც, რომ ეს სტრატეგია უკვე მრავალ სკოლაში დაინერგა. კედლებზე ვაკრავ სამოტივაციო პოსტერებს, გაყალბებულ სტატისტიკას და შემომაქვს მკაცრი წესები. იმისთვის, რომ მოსწავლეებმა ლაპარაკის უფლება მიიღონ, მათ ხელი უნდა ასწიონ, იმ შემთხვევაშიც კი, თუ ერთმა მეორეს ფანქარი უნდა სთხოვოს. ცუდად მოქცევის შემთხვევაში მათ ქულები აკლდებათ, სხვა მოსწავლის უწესობის დაფიქსირებისთვის კი - ემატებათ. ვუხსნი, რომ მათი პასუხისმგებლობაა, რომ პირადად შემატყობინონ სხვების მიერ თუნდაც მსუბუქი გადახვევების შესახებ. კითხვების დასმა ამ პროცესთან დაკავშირებით - აკრძალულია. ექსპერიმენტის დამაჯერებლობისთვის, ამ პროცესში ჩემი კოლეგებიც მეხმარებიან ხოლმე"

დიანა უკვე მრავალი წელია, ექსპერიმენტს ატარებს და შედეგი ყოველ ჯერზე ერთი და იგივეა. უფროსკლასელები წესებს ემორჩილებიან, წიგნის გაცნობისას კი ექსპერიმენტს აანალიზებენ. თუმცა, წელს მოსწავლეები პირველად ამბოხდნენ. მათ ადმინისტრაციას წერილი მისწერეს და დერეფნებში საპროტესტო პოსტერები გამოაკრეს. ქულების სისტემაში ჩართვაზე კი კატეგორიული უარი განაცხადეს.

მოსწავლეების გაერთიანების პრეზიდენტმა, რომელსაც დიანა საერთოდ არ ასწავლის, ელექტრონული წერილით მოითხოვა "პროგრამის" შეწყვეტა. მის წერილში ეწერა, რომ მასწავლებლის სტრატეგია ფაშიზმს ახალისებს და ასეთი განცხადებები დიქტატორული რეჟიმის საფრთხეს ქმნის. "ამ სკოლამ და ზოგადად, ქვეყანამ არ უნდა დაუშვას მსგავსი ტოტალიტარული ტენდენციები" - აცხადებდა უფროსკლასელი. დიანამ, სიმულაციის ფარგლებში, ყველა ფორმით სცადა ამბოხების ჩახშობა. ეცადა, მოესყიდა მოსწავლეები, დაემუქრა გარიცხვით და ასე შემდეგ, თუმცა საპროტესტო ტალღა კიდევ უფრო გაძლიერდა.

საბოლოოდ, ექსპერიმენტი დაგეგმილზე ორი დღით ადრე დასრულდა და ყველამ შეიტყო თავდაპირველი ჩანაფიქრის შესახებ.

"მეამბოხეები გადაგვარჩენენ. მაშინ, როცა უფროსები ხშირად მიდიან საკუთარ პრინციპებთან კომპრომისებზე, თინეიჯერები უსამართლობას უბრალოდ არ ითმენენ. ნუ დაუძახებთ მათ გათამამებულებს, მათი სითამამე ცუდს არაფერს ემსახურება. შეაქეთ მეამბოხეები. ისინი ჩვენი საუკეთესო მოკავშირეები არიან" - წერს მასწავლებელი.