ხანძრის გაჩენის 7 ყველაზე გავრცელებული მიზეზი

ბოლო დროს განვითარებული მოვლენებიდან გამომდინარე, ქართულ სოციალურ მედიაში ხანძრები და მათი გამომწვევი მიზეზები საკმაოდ აქტუალური თემა გახდა.

ამ სტატიაში შევეცდებით, ხანძრების შესახებ პრევენციული ხასიათის ინფორმაცია მოგაწოდოთ.

ნახეთ ხანძრის გაჩენის 7 ყველაზე გავრცელებული მიზეზი:

1. გაზქურა

გაზქურაზე კერძების მომზადებისას აუცილებელია, სიფრთხილე გამოიჩინოთ, რადგან ცეცხლზე უყურადღებოდ დატოვებული ჭურჭელი შეიძლება დაგეწვათ და არა მხოლოდ ვახშმის, საცხოვრებელი სახლის გარეშეც დარჩეთ.

2. გამათბობელი

გამათბობლის გარეშე ზამთრის გადაგორება შეუძლებელია, მაგრამ მისი დადგმისას აუცილებლად შეარჩიეთ ისეთი ადგილი, სადაც ერთი მეტრის რადიუსზე არანაირი აალებადი ნივთი, ფარდა ან ხალიჩა არ იქნება.

3. მოკიდებული სიგარეტი

სიგარეტის მოწევა არა მხოლოდ ცუდი, არამედ სახიფათო ჩვევაა. ცეცხლმოკიდებული ღერის საფერფლეში დატოვება ან სანაგვეში ჩაგდება შეიძლება ძვირად დაგიჯდეთ.

4. ელექტროგაყვანილობა

გაუმართავი ან ძველი ელექტროგაყვანილობის გამო ხანძრები საკმაოდ ხშირად ჩნდება. მაშინაც კი, თუ ფიქრობთ, რომ ყველაფერი მწყობრშია, არასასურველი შემთხვევების თავიდან ასარიდებლად აუცილებელია სადენების პერიოდული შემოწმება.

5. სანთელი

სანთლის ერთი შეხედვით პატარა და უწყინარი ცეცხლის ალი საკმაოდ დიდი ხანძრის გამომწვევ მიზეზად შეიძლება იქცეს. მოერიდეთ სანთლების ავეჯთან, ფარდების სიახლოვეს ან ნებისმიერ არამყარ ზედაპირზე დადგმას.

6. აალებადი სითხეები

თუ სახლში აალებადი ნივთიერებები გაქვთ, როგორიც არის ნავთი, ბენზინი ან სპირტი, აუცილებლად დარწმუნდით, რომ ის უსაფრთხო ადგილას ინახება.

7. ძველი ნათურა

სახლის განათებებს ერთგვარი დეკორაციული ხასიათიც აქვს, ამიტომ ადამიანებს უყვართ, როდესაც მათ ოთახს ლამაზი ბრა, ჭაღი თუ სანათი ამშვენებს. სილამაზე კარგია, მაგრამ არსებობს საშიშროება, რომ მოძველებული და მწყობრიდან გამოსული ნათურა აფეთქდეს და ხანძარი გამოიწვიოს.

ბოლო ამბები:

გირჩევთ