ოსკარის მფლობელმა მსახიობმა, ემა სტოუნმა DC-ის კომიქსის ეკრანიზაციაში მონაწილეობაზე უარი თქვა. როგორც ცნობილია, მას Wonder Woman-ის მეორე ნაწილში ქალი საოცრების მთავარი მოწინააღმდეგის, ბარბარა ენ მინერვას, იგივე ავაზას, როლი უნდა შეესრულებინა.

პატი ჯენკინსის ფილმმა, Wonder Woman, საერთაშორისო გაქირავებაში, საერთო ჯამში, $821.9 მილიონზე მეტი დააგროვა და თითქმის ყველა რეკორდი მოხსნა, რაც აქამდე ქალ რეჟისორებს ჰქონიათ.

გამომდინარე იქიდან, რომ ფილმი წარმატებული აღმოჩნდა Warner Bros. და DC კინოსურათის მეორე ნაწილის გადაღებასაც გეგმავენ, რომელიც 2019 წლის დეკემბერში გამოვა.

ცოტა ხნის წინ ფილმის პირველი ნაწილის რეჟისორმა, პატი ჯენკინსმა ოფიციალურად დაადასტურა, რომ მეორე ნაწილის რეჟისორიც ის იქნება.

აღსანიშნავია, რომ ჯენკინსი ამ შემთხვევაში გახდება ყველაზე მაღალანაზღაურებადი ქალი რეჟისორი, რომელიც ფილმისთვის ფიქსირებული $8 მილიონის გარდა ფილმის შემოსავლიდანაც მიიღებს წილს.

თუ ჭორებს დავუჯერებთ ჯენკინსს დიდი სურვილი აქვს, რომ ფილმში მოქმედება 1980-იან წლებში განვითარდეს და გალ გადოტის პერსონაჟმა ცივი ომის პერიოდში იმოგზაუროს, სადაც ის საბჭოთა კავშირის წინააღმდეგ იბრძოლებს.