ძალიან პოპულარული სარაჰაჰი, რომლის საშუალებითაც მომხმარებლები ერთმანეთს ანონიმურ მესიჯებს უგზავნიდნენ, გუგლმა და ეფლმა მობილური აპლიკაციების ონლაინ მაღაზიებიდან ამოიღეს.

BBC-ის ცნობით, უდიდესი კომპანიების ამ ნაბიჯს წინ უძღოდა ბრალდებები იმის თაობაზე, რომ სამესიჯო აპლიკაცია ბულინგს უწყობდა ხელს.

სარაჰაჰი კრიტიკას არ ღებულობს და აცხადებს, რომ აპლიკაცია ისედაც არ იყო განკუთვნილი ბავშვებისთვისა და მოზარდებისთვის.

ავსტრალიელმა ქალმა, კატრინა კოლინსმა განაცხადა, რომ მისი 13 წლის შვილი სარაჰაჰის საშუალებით ბოროტი შინაარსის მესიჯებს იღებდა. ერთი უცნობი მის თინეიჯერი გოგოს მისამართით წერდა, რომ თავი უნდა მოეკლა და მისი ცხოვრება არავის აინტერესებდა. სხვები კი შეურაცხმყოფელ და არანორმატიულ ტექსტებს წერდნენ.

დედის სიტყვებით, სარაჰაჰის აპლიკაცია მისი შვილის მეგობარმა ჩაწერა და შემდეგ მისთვის განკუთვნილი ტექსტები აჩვენა.

კოლინსმა Change.org-ზე პეტიცია წამოიწყო და გუგლსა და ეფლს სარაჰაჰის ონლაინ მაღაზიებიდან წაშლისკენ მოუწოდა, რადგან მისი თქმით, აპლიკაცია ხელს უწყობდა ბულინგსა და საკუთარი თავისთვის ზიანის მიყენების მიდრეკილების გაღვივებას. პეტიციამ 469 ათასზე მეტი მხარდამჭერი მოიზიდა.

სარაჰაჰი უკვე თვეებია არსებობს და ის არაბულ ქვეყნებში შეიქმნა. მისი გენერალური დირექტორი, ზაინ-ალაბდინ თაუქიფი გუგლისა და ეფლის გადაწყვეტილებას უსამართლობად აფასებს, თუმცა კომპანიებთან მოლაპარაკებების დაწყებას განიხილავს.

სარაჰაჰი არაბულად გულწრფელობას ნიშნავს.