რუსეთში მოქალაქეებმა გზების გაწმენდის ახალ გზას მიაგნეს - დააწერე პრობლემას "ნავალნი" და ის გაქრება.

მოსკოვის მაცხოვრებელმა, ტატიანა გრიგორევამ გადაწყვიტა, გზის თოვლისგან გაწმენდის ალტერნატიული გზა მოეძებნა. ამისთვის კი საკმარისი აღმოჩნდა, რუსი ოპოზიციონერი პოლიტიკოსის, ალექსეი ნავალნის გვარი დაეწერა თოვლის გროვაზე. გზა მალევე გაწმინდეს. ინფორმაციას Meduza ავრცელებს.

"ტატიანას მეთოდი" ტვიტერში აიტაცეს, წარწერა "ნავალნი" რეგიონებშიც გაჩნდა. ერთ-ერთი ადგილობრივის ინფორმაციით, "ტომსკის ოლქში ოპოზიციონერის გვარი ისეთი მონდომებით გააქრეს, რომ პოლიციის შენობის აღმნიშვნელი ნიშანიც მიაყოლეს."

"ტატიანას მეთოდს" თავად ალექსეი ნავალნიც გამოეხმაურა: "სერიოზულად ვფიქრობ, მეც ხომ არ ვცადო, სახლის წინ უკვე სამი კვირაა გზაა გასაწმენდი"

რუსეთის მოქალაქეებმა გადაწყვიტეს, ამ მეთოდით სხვადასხვა პრობლემის მოგვარება სცადონ და ტვიტერზე აქცია დაიწყო.

"ნავალნი გზის გაუმართავ მონაკვეთზე რომ დავწერო, ახალ ასფალტს დააგებენ?"

"ძველ ხიდზე ნავალნი რომ დავწერო, რამდენია იმის ალბათობა, რომ ახალი, ნორმალური ხიდი ააშენონ?"

"ნავალნი მერიას რომ დავაწერო, აიღებენ?"

"თავად ნავალნის რომ დავაწერო ნავალნი, მასაც გააქრობენ?"

მომხმარებელთა ნაწილმა კი გადაწყვიტა "ტატიანას მეთოდი" პირადი პრობლემების მოსაგვარებლად გამოიყენოს.

"ოთახში იატაკზე რომ დავწერო ნავალნი, იმასაც დაალაგებენ?"

"საინტერესოა საგამოცდო ტესტს რომ დავაწერო ნავალნი, ჩემ ნაცვლად დაწერენ?"

"დავიწერ ნავალნის გამონაყარსა და ზედმეტ წონაზე, ეგებ და ვინმემ ისიც გააქროს"

ალექსეი ნავალნი ვლადიმერ პუტინის ყველაზე დიდი ოპოზიციონერია. ის საპრეზიდენტო არჩევნებზე არ დაარეგისტრირეს. რუსეთის საარჩევნო კომისია გადაწყვეტილებას იმით ხსნის, რომ ნავალნი ნასამართლევია სისხლის სამართლის საქმეზე, რაც არჩევნების შესახებ კანონს ეწინააღმდეგება. თავად ნავალნი კი კონსტიტუციაზე მიუთითებს, რომელშიც თავისუფლებაში მყოფი ადამიანის ნასამართლეობის გამო უარის თქმაზე არაფერი წერია. ნავალნი რუსეთის ცესკოს გადაწყვეტილებას საკონსტიტუციო სასამართლოში გაასაჩივრებს.