ადამიანის უფლებების სწავლებისა და მონიტორინგის ცენტრი საქართველოს პროკურატურას მოუწოდებს პოეტ ზვიად რატიანს დაზარალებულის სტატუსი მიანიჭოს. საქმე ეხება ზვიად რატიანის დაკავებისას სამართალდამცავების მხრიდან შესაძლო უფლებამოსილების გადამეტებას.

EMC მიიჩნევს, რომ რატიანის საქმეზე გამოძიების დაწყების შემდეგ გონივრული ვადა უკვე გავიდა და საქმეში არსებული სათანადო საფუძვლებით მას აქამდე დაზარალებულის სტატუსი უნდა მინიჭებოდა. ორგანიზაციის განცხადებაში ნათქვამია, რომ რატიანისთვის სტატუსის მიუნიჭებლობა გამოძიების პროცესის დამოუკიდებლობის და სანდოობის მიმართ კითხვებს აჩენს.

მათი თქმით, სამედიცინო ექსპერტიზის დასკვნით დადგინდა, რომ რატიანს სხეულზე აღენიშნება დაზიანებები, რომელიც პოლიციელებთან კომუნიკაციამდე არ ჰქონდა.

ორგანიზაცია მოუწოდებს თბილისის პროკურატურას:

  • ზვიად რატიანს მიენიჭოს დაზარალებულის სტატუსი;
  • დროულად ჩატარდეს ზვიად რატიანის სიტყვიერ და ფიზიკურ შეურაცხყოფაში მონაწილე პოლიციის თანამშრომელთა ამოცნობა;
  • დადგინდეს ზვიად რატიანის დროებითი მოთავსების იზოლატორთან საათნახევრის განმავლობაში დაყოვნების რეალური მიზეზი, მათ შორის, მოხდეს იმ პირების გამოკითხვა, რომლებიც დროის იმავე მონაკვეთში იმყოფებოდნენ იზოლატორის ავტოსადგომზე და შესაძლოა ფლობდნენ გამოძიებისთვის მნიშვნელოვან ინფორმაციას.

როგორც ცნობილია, ზვიად რატიანი 2017 წლის 23 დეკემბერს სპეციალური საპოლიციო კონტროლის ფარგლებში ძველი თბილისის სამმართველოს მეხუთე განყოფილების თანამშრომლებმა შეაჩერეს. მას სამართალდამცავების კანონიერი მოთხოვნისადმი დაუმორჩილებლობას და ხულიგნობას ედავებოდნენ. თბილისის საქალაქო სასამართლომ პოეტ ზვიად რატიანს 2 000-ლარიანი ჯარიმის გადახდა დააკისრა.

ზვიად რატიანის განცხადებით, ადმინისტრაციული წესით მისი დაკავების შემდეგ, პოლიციის თანამშრომლებმა მას ფიზიკური და სიტყვიერი შეურაცხყოფა მიაყენეს. სამართალდამცავების მიმართ წაყენებულ ბრალდებასთან დაკავშირებით მთავარმა პროკურატურამ გამოძიება დაიწყო. მოკვლევას აწარმოებს შინაგან საქმეთა სამინისტროს გენერალური ინსპექციაც.