საქართველოს პროკურატურის განცხადებით, გიორგი გიორგანაშვილმა, იგივე ბახალამ, თურქეთიდან 843 აბი და 2 ცალი აბის ნატეხი სუბოტექსი თურქეთიდან რეანობილით შემოატანინა.

უწყების განმარტებით, ბახალას დაკავებამდე ერთი დღით ადრე, 24 იანვარს თბილისი-სენაკი-ლესელიძის გზატკეცილზე გააჩერეს რეანომობილი, რომლის ჩხრეკისას სამედიცინო ინვენტარის ყუთიდან 843 აბი და 2 ცალი აბი ნატეხი სუბოტექსი ამოიღეს.

როგორც პროკურატურის განცხადებაშია ნათქვამი, რეანომობილის დაკავებულმა მძღოლმა დაკითხვისას თქვა, რომ ნარკოტიკული საშუალება თურქეთში გიორგი გიორგანაშილმა გადასცა, რათა საქართველოში კონკრეტული პირისთვის შემოეტანა. უწყების განცხადებით, აღნიშნულ ფაქტთან დაკავშირებით მიმდინარეობს გამოძიება.

მიუხედავად იმისა, რომ პროკურატურა განცხადებაში საუბრობს 843 აბზე, მას ბრალი სულ სხვა ეპიზოდისთვის წაუყენეს და სამართალდამცავ უწყებას ოფიციალურად არ მოუთხოვია გიორგანაშვილის პასუხისგებაში მიცემა რეანომობილში აღმოჩენილი სუბოტექსისთვოს.

მსახიობი გიორგი გიორგანაშვილი, იგივე ბახალა, 25 იანვარს დააკავეს. შსს-ს ინფორმაციით, პირადი ჩხრეკისას, თბილისის შემოსასვლელში, მას 45 აბი და 4 აბის ნატეხი, ანუ 0,3726 გრამი სუბოტექსი აღმოუჩინეს. მსახიობის თქმით, ნარკოტიკული საშუალება ჩაუდეს. ის ბრალს არ აღიარებს და საპროცესო შეთანხმებასაც არ დათანხმდა.

გუშინ, თბილისის საქალაქო სასამართლომ შენახვა-ფლობისთვის 8-წლიანი პატიმრობა მიუსაჯა. პროცესის შემდეგ, სასამართლოსთან ხმაურის მოძრაობის აქტივისტი ბექა წიქარიშვილი და მსახიობი თორნიკე ბზიავა დააკავეს. თორნიკე ბზიავა უკვე გაათავისუფლეს.

გიორგანაშვილის დაკავების გასაპროტესტებლად, თბილისში, კანცელარიასთან 25 იანვარს ხუთ საათზე, აქცია გაიმართება.