საქართველოსა და ევროკავშირს შორის ასოცირების შეთანხმება დღეიდან სრულად ამოქმედდა. ძალაში შევიდა საგარეო და უსაფრთხოების პოლიტიკასთან დაკავშირებული მუხლები.

ევროინტეგრაციის საკითხებში სახელმწიფო მინისტრის, დავით ბაქრაძის განმარტებით, ევროკავშირის წევრი ქვეყნების საკანონმდებლო ბაზა ხელმისაწვდომი იქნება და სრულად ამოქმედდება მუხლები, რომლებიც უკავშირდება პერსონალურ მონაცემთა დაცვას, ჯანდაცვას, განათლებასა და უსაფრთხოების დაცვას.

მისი თქმით, ყველა დამოუკიდებელმა სახელმწიფომ უკვე აღიარა ამ დოკუმენტის მნიშვნელობა და ხელი მოაწერა მას:

"უშუალოდ ეროვნულმა პარლამენტებმა მოაწერეს ხელი და უკვე ამოქმედდა ამ დიდი დოკუმენტის ის მუხლები, რომელიც ჩვენს ორმხრივ ურთიერთობას არეგულირებს უკვე წევრ სახელმწიფოებთანაც".

ევროკავშირის ელჩმა, იანოშ ჰერმანმა განმარტა, რომ ასოცირების შესახებ ხელშეკრულებას უამრავი სარგებელი აქვს, ერთ-ერთი მნიშვნელოვანი ასპექტი კი საქართველოს უკეთესი საერთაშორისო მდგომარეობაა. მისი თქმით, ყველა რეფორმას, რომელიც წარმატებით განხორციელდება რეგიონულ დონეზე ექნება გავლენა:

"თუ ყველაფერი შესრულდება ეს საქართველოს სტატუსზე მთელს რეგიონში იმოქმედებს. ეს არ არის მხოლოდ თეორია, რადგან შემიძლია დაგისახელოთ კონკრეტული მაგალითები ყველა სფეროში. უკვე მიმდინარეობს საჯარო ადმინისტრაციის სასამართლო სისტემის გაუმჯობესება. უკვე იგრძნობა ეკონომიკური სარგებელიც. ასოცირების ხელშეკრულებაში ჩვენ გვაქვს უმაღლესი სტანდარტები უკეთეს გარემოსთან დაკავშირებითაც".

ასოცირების ხელშეკრულების პირველი ნაწილი, მათ შორის ღრმა და ყოვლისმომცველი თავისუფალი ვაჭრობის კომპონენტის შესახებ, საქართველოში 2014 წლის სექტემბერიდან შევიდა ძალაში.