უკრაინაში, კიევში, წუთის წინ აქცია სახელწოდებით "მარში იმპიჩმენტისთვის" დაიწყო. რამდენიმე ათასი ადამიანი ოპოზიციური პარტიების წარმომადგენლებთან ერთად მეიდანზე არიან შეკრებილები და პრეზიდენტის იმპიჩმენტთან ერთად მიხეილ სააკაშვილის გათავისუფლებას ითხოვენ.

ფოტო: pravda.com.ua

"მცდელობა, გააჩერონ ეს მოძრაობა ვინმეს დაჭერით, განსაკუთრებით მიშას ციხეში გაშვებით, არის შეუძლებელი უკრაინაში. რაც დაიწყო, დაიწყო და აუცილებლად დამთავრდება გამარჯვებით", - განაცხადა ახალი ძალების მოძრაობის ლიდერმა, დავით საყვარელიძემ აქციის მონაწილეების მიერ მსვლელობის დაწყებამდე.

გუშინ, 9 დეკემბერს, მეორედ დაკავების შემდეგ, მიხეილ სააკაშვილის ფეისბუკის ოფიციალური გვერდით მისი სახელით მიმართვა გავრცელდა. ამ მიმართვით სააკაშვილი მხარდამჭერებს აქციაზე მისვლისკენ მოუწოდებდა.

პირველად კი ის 5 დეკემბერს დააკავეს. 5 დეკემბრის დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.

სახურავზე ყოფნისას, სააკაშვილი უკრაინის მოსახლეობას მოუწოდებდა, რომ ქუჩაში გამოსულიყო და ამ უსამართლობას წინ აღდგომოდა. ამ მოწოდების შემდეგ, სააკაშვილის ბინასთან მისი მხარდამჭერები შეიკრიბნენ და სპეცრაზმის ავტომობილიდან დაიხსნეს. საქართველოს მესამე პრეზიდენტი 5 დეკემბრის შემდეგ კიევის ცენტრში, კარვების ქალაქში იმყოფებოდა, მასზე კი ძებნა იყო გამოცხადებული.

უკრაინის ხელისუფლების ცნობით, სააკაშვილის ბინაში ჩხრეკა მის მიერ ორგანიზებული მიტინგების წინა ხელისუფების მიერ დაფინანსებას უკავშირდება. სააკაშვილი ბრალდებებს აბსურდულს უწოდებს.