საქართველოს პარლამენტის ეროვნული ბიბლიოთეკის პირველ კორპუსში წიგნის მუზეუმი გაიხსნება. ღონისძიება ხვალ, 17 ნოემბერს გაიმართება.

როგორც კულტურის სამინისტრო წერს, მუზეუმი კავკასიაში ყველაზე დიდი იქნება და იგი ბოლო ათწლეულების ყველაზე მასშტაბური პროექტს წარმოადგენს ამ სფეროში.

მუზეუმი ქვეყანაში დაცული ძვირფასი წიგნების პირველი მუდმივმოქმედი გამოფენაა, რომელიც ოთხ ნაწილადაა წარმოდგენილი:

  1. საკუთრივ იშვიათი გამოცემების მუზეუმი, სადაც სიძველით და ფორმით გამორჩეული წიგნებია წარმოდგენილი – მაგალითად, ქართულ-იტალიური ლექსიკონი (1629), ვახტანგის სტამბის გამოცემები, ინკუნაბულა და სხვ.;
  2. "ვეფხისტყაოსნის" მუზეუმი – აქ წარმოდგენილია პოემის ყველა გამოცემა ქართულ და უცხოურ ენებზე;
  3. ილიას დარბაზი – ილია ჭავჭავაძის კაბინეტის ექსპოზიცია, მისი პირადი ნივთებითა და ბიბლიოთეკით;
  4. ბროსეს საცავი – აღჭურვილია შესაბამისი კლიმატ–კონტროლის აპარატურით.

სამინისტრო განმარტავს, რომ ეროვნულ ბიბლიოთეკაში დაცული იშვიათი გამოცემებისთვის საცავის და მუზეუმის გამართვა ბიზნესის თანადგომით გახდა შესაძლებელი. ეროვნული ბიბლიოთეკის პარტნიორი იყო "დავით ბეჟუაშვილის განათლების ფონდი".