ხშირად გვესმის მსჯელობა იმის შესახებ, როდის არის წყლის დალევა სასურველი. ამ თემაზე მეცნიერულ მოსაზრებებთან ერთად, უამრავ მითსა და დეზინფორმაციასაც შეხვდებით. ამიტომ, ამ სტატიაში მოკლედ და მარტივად აგიხსნით, რას უნდა მივაქციოთ რეალურად ყურადღება.

ზოგადი ორიენტირის სახით, ევროპის სურსათის უვნებლობის ორგანო (EFSA) ზრდასრული ქალებისთვის დღეში დაახლოებით 2 ლიტრ, კაცებისთვის კი 2.5 ლიტრ წყლის მიღებას გვირჩევს. ეს რაოდენობა მოიცავს არა მხოლოდ წყალს, არამედ საკვებიდან და სხვა სასმელებიდან მიღებულ სითხესაც. ბუნებრივია, ეს რიცხვი იზრდება სიცხის, ინტენსიური ფიზიკური აქტივობისა და სხვა პირობების დროს.

წყლის დალევა დილით

ფოტო: Naturally Yours

უზმოზე წყლის დალევა კარგი პრაქტიკაა, განსაკუთრებით თუ გაღვიძებისას გწყურიათ. ძილის დროს რამდენიმე საათის განმავლობაში ორგანიზმი სითხეს არ იღებს, ამიტომ დილას წყლის დალევა ამ ბალანსის აღდგენას უწყობს ხელს. მეორე მხრივ, გასათვალისწინებელია, რომ არ არსებობს მტკიცებულება, თითქოს უზმოზე დალეულ წყალს განსაკუთრებული "გამწმენდი" ეფექტი აქვს.

ჭამამდე ან ჭამის დროს

მითია, რომ ჭამის დროს წყლის დალევა საჭმლის მონელებას აფერხებს. მოსაზრება, თითქოს წყალი კუჭის მჟავას ან საჭმლის მომნელებელ ფერმენტებს ისე "აზავებს", რომ მონელება ფერხდება, სამეცნიერო მტკიცებულებით არ დასტურდება.

უფრო მეტიც, კვლევების მიხედვით, ჭამამდე 500 მლ წყლის მიღებამ ზოგიერთ ადამიანში შესაძლოა დროებით გაზარდოს დანაყრების შეგრძნება, შეამციროს მიღებული საკვების რაოდენობა და ხელი შეუწყოს წონაში ჯანსაღად კლების პროცესს.

ვარჯიშისას

ფოტო: Adobe Stock

შეხედულება, რომ ვარჯიშის დროს წყლის დალევა არასასურველია, არასწორია. ფიზიკური აქტივობისას ორგანიზმი ოფლით სითხეს კარგავს, განსაკუთრებით სიცხეში ან ინტენსიური დატვირთვისას, ამიტომ წყლის მიღება მნიშვნელოვანია როგორც ვარჯიშამდე, ისე ვარჯიშის დროსაც.

ძილის წინ

ფოტო: Healthline

ძილის წინ დიდი რაოდენობით სითხის მიღებამ შესაძლოა მშვიდი ძილი შეაფერხოს, ამიტომ სასურველი არ არის, თუმცა ორგანიზმზე უარყოფითი გავლენა არც ამას აქვს.

საბოლოოდ, წყლის დასალევად უნივერსალური "საუკეთესო დრო" არ არსებობს. ყველაზე სწორი მიდგომაა სითხის რეგულარულად მიღება დღის განმავლობაში, წყურვილისა და ორგანიზმის საჭიროების შესაბამისად.

როდის არის საჭირო სიფრთხილე?

ჯანმრთელი ადამიანისთვის წყლის დალევა, მათ შორის ჭამის დროს, ჩვეულებრივ უსაფრთხოა. თუმცა, მძიმე გულის უკმარისობის ან თირკმლის ფუნქციის მნიშვნელოვანი დაქვეითების დროს ორგანიზმს შესაძლოა ზედმეტი სითხის გამოდევნა გაუჭირდეს. ასეთ შემთხვევაში ჭარბმა სითხემ შეიძლება ხელი შეუწყოს შეშუპებას, ქოშინს ან სხვა გართულებებს. ამიტომ სითხის რაოდენობა ასეთ პაციენტებში ინდივიდუალურად უნდა განისაზღვროს ექიმის რეკომენდაციით.