Claude-ის შემქმნელი კომპანია Anthropic საავტორო უფლებებთან დაკავშირებული დავის მოსაგვარებლად $1.5 მილიარდის გადახდას დასთანხმდა. კომპენსაცია იმ ავტორებსა და გამომცემლებს შორის განაწილდება, რომელთა წიგნების პირატული ასლებიც, ბრალდების მიხედვით, კომპანიამ ხელოვნური ინტელექტის მოდელების გასაწვრთნელად გამოიყენა.

შეთანხმება დაახლოებით 482 000 ნაწარმოებს მოიცავს. თითოეულ წიგნზე $3 000 გამოიყოფა, რომელიც ავტორსა და გამომცემელს შორის თანაბრად გაიყოფა — თითოეულ მათგანს დაახლოებით $1 500 შეხვდება.

შეთანხმებაში Bloomsbury-ის მიერ გამოცემული 14 087 წიგნიც შედის. გამომცემლობა ჯოან როულინგის Harry Potter-ის სერიასაც გამოსცემს, ამიტომ კომპენსაციის მიღება შესაძლოა მწერალმაც შეძლოს. თუმცა, ჯერჯერობით დადასტურებული არ არის, მოხვდა თუ არა Harry Potter-ის რომელიმე წიგნი იმ ნაწარმოებების სიაში, რომელთა გამოც Anthropic კომპენსაციას იხდის. თუ სერიის წიგნები სიაში აღმოჩნდება, როულინგს თითოეულ მათგანზე დაახლოებით $1 500 შეხვდება.

ფოტო: The Boston Globe

ფოტო: Getty Images

Anthropic-ის ინფორმაციით, შეთანხმებაში შესული ნაწარმოებების ავტორთა დაახლოებით 91%-მა კომპენსაციის მისაღებად მოთხოვნა უკვე წარადგინა.

საქმე 2024 წლის აგვისტოში დაიწყო, როდესაც მწერლებმა ანდრეა ბარცმა, ჩარლზ გრებერმა და კირკ უოლეს ჯონსონმა Anthropic დაადანაშაულეს, რომ კომპანია Claude-ის გასაწვრთნელად მათი წიგნების პირატულ ასლებს იყენებდა.

ეს აშშ-ის ისტორიაში საავტორო უფლებებთან დაკავშირებული ყველაზე დიდი ფინანსური შეთანხმებაა. გადაწყვეტილება სხვა AI კომპანიებისთვისაც გაფრთხილებაა, რომ მწერლების ნამუშევრების პირატული მონაცემთა ბაზებიდან გამოყენება შეუმჩნეველი არ დარჩება.