გავრცელებული ინფორმაციით, Warner Bros. მოლაპარაკებებს აწარმოებს საავტორო უფლებების მოსაპოვებლად, რათა Cartoon Network-ის საკულტო სერიალის, Powerpuff Girls-ის მიხედვით კიდევ ერთი სრულმეტრაჟიანი ანიმაციური ფილმი გადაიღოს.

ამ პროექტის შესახებ ინფორმაცია პირველად CinemaCon-ზე გაჟღერდა, მოგვიანებით კი Annecy-ის საერთაშორისო ფესტივალზე, Warner Bros.-ის საპრეზენტაციო რგოლშიც დაადასტურეს.

The Powerpuff Girls-ის სამყარო კრეიგ მაკკრეკენმა შექმნა. სერიალის პრემიერა 1998 წელს შედგა. ის მალევე იქცა გლობალურ ფენომენად და ორი ემის ჯილდოც კი დაიმსახურა. პროექტი ეკრანებზე ექვსი სეზონის განმავლობაში, 2005 წლის ჩათვლით გადიოდა. აღსანიშნავია, რომ 2002 წელს გამოსული სრულმეტრაჟიანი ანიმაციური ფილმი დიდად წარმატებული არ აღმოჩნდა — Box Office Mojo-ს მონაცემებით, მან აშშ-ის ბაზარზე მხოლოდ $11.4 მილიონი, მსოფლიო მასშტაბით კი $16 მილიონზე ოდნავ მეტი გამოიმუშავა.

2002 წლის ანიმაციური ფილმი

2002 წლის ანიმაციური ფილმი

ფოტო: Letterboxd

ანიმაცია მოგვითხრობს გენეტიკური ინჟინერიით შექმნილ, სუპერძალების მქონე სამ დაზე — ბლოსომზე, ბაბლსსა და ბათერქაფზე. ისინი თავიანთ გამომგონებელ მამასთან, პროფესორ უტონიუმთან ერთად ქალაქ თაუნსვილში ცხოვრობენ. გოგონებს ხშირად ქალაქის მერი კრიმინალთან საბრძოლველად უხმობს.

გარკვეული პერიოდის განმავლობაში მუშავდებოდა სერიალის live-action ვერსიაც, სადაც მთავარი გმირები უკვე ოცდაათ წლამდე ასაკის გოგონები უნდა ყოფილიყვნენ. Warner Bros.-ის პროექტის სცენარზე დიაბლო კოდი და ჰეზერ რენიე მუშაობდნენ, თავად მაკკრეკენი ამ ვერსიაში ჩართული არ ყოფილა. იმის მიუხედავად, რომ სერიალის საპილოტო სერია გადაიღეს, პროექტი აღარ გაგრძელებულა.