სომხეთის ერთ-ერთი ყველაზე მდიდარი და გავლენიანი პოლიტიკოსი, გაგიკ წარუკიანი ჰატისის მთის მწვერვალზე, 2 500 მეტრზე, იესო ქრისტეს ყველაზე მაღალი ქანდაკების აღმართვას გეგმავს. მონუმენტი სომხეთის დედაქალაქის უდიდესი ნაწილიდან გამოჩნდება. გაგიკ წარუკიანმა აღნიშნა, რომ მისი პროექტი ბრაზილიის ცნობილ ქრისტეს ქანდაკებას ბევრად გადააჭარბებს და ნიუ-იორკის "თავისუფლების ქანდაკებაზე" ოდნავ მაღალიც კი იქნება.

ფოტო: Gagik Tsarukyan

სომხეთში იესო ქრისტეს ყველაზე მაღალი ქანდაკების აღმართვას სხვადასხვანაირად აფასებენ. ზოგისთვის პროექტი სომხეთის უძველესი ქრისტიანული ფესვების პატივისცემაა, სხვებისთვის კი — ერთი გავლენიანი ოლიგარქის მორიგი ახირება. სომხური ეკლესია ამ პროექტს თავიდანვე აქტიურად ეწინააღმდეგება. სასულიერო პირების განცხადებით, ქანდაკების გიგანტური მასშტაბები და სტილი სომხეთის რელიგიური და არქიტექტურული ტრადიციებისთვის სრულიად უცხოა.

ეს პროექტი სომხეთის სავიზიტო ბარათი გახდება. ქრისტიანობა ქვეყნის ახალ ბრენდად იქცევა.

გაგიკ წარუკიანი

გაგიკ წარუკიანის თქმით, ეს პროექტი იმ მზარდ საერთაშორისო ტალღას ეხმიანება, რომელიც რელიგიას, ნაციონალიზმსა და კონსერვატიზმს აერთიანებს — ტენდენციას, რომელიც ყველაზე მკაფიოდ დონალდ ტრამპის MAGA მოძრაობასა და ევროპის უკიდურესად მემარჯვენე პარტიებში ჩანს.

"ტრამპი, რა თქმა უნდა, მოწვეულია. იმედი გვაქვს, ჩამოვა", — დასძინა გაგიკ წარუკიანმა და აღნიშნა, რომ მთაზე, სადაც ქანდაკება უნდა დაიდგას, აშშ-ის საელჩოს არაოფიციალური დელეგაცია უკვე იმყოფებოდა.

ფოტო: The Guardian

ქანდაკების მშენებლობა ჯერ კიდევ 2022 წელს დაიწყო, თუმცა სამუშაოები პერიოდულად ჩერდება ხოლმე. ამ ეტაპზე იესო ქრისტეს გიგანტური ფიგურა მთის მწვერვალზე კი არ დგას, არამედ ერევნის გარეუბანში, ერთ-ერთ სამშენებლო მოედანზე ნაწილ-ნაწილ იწყობა, საიდანაც მას საბოლოო ლოკაციაზე მოგვიანებით გადაიტანენ.

ჩვენ მსოფლიოში უძველესი ქრისტიანი ერი ვართ. ამიტომ, სრულიად ლოგიკურია, რომ იესოს ყველაზე დიდი ქანდაკებაც სწორედ ჩვენთან უნდა იდგეს.

გაგიკ წარუკიანი

მისი თქმით, იესოს ქანდაკება მხოლოდ დასაწყისია — იქვე ახლოს "ნოეს კიდობნის" მშენებლობაც დაიწყო. ეს იქნება 134-მეტრიანი გიგანტური ხომალდი, რომელშიც მუზეუმი, სასტუმრო და კაფე განთავსდება.

"ეს წმინდა პროექტებია. ასე ჩავწერ ჩემს სახელს ისტორიაში", — ამბობს სომეხი მილიარდერი.

ამ თვის საპარლამენტო არჩევნებზე წარუკიანმა ხმების 4%-იც კი ვერ მოაგროვა, რის გამოც მისი შანსები, ოდესმე სათავეში ჩაუდგეს სომხეთს, ძალიან მცირეა. წარუკიანი ყოფილი სპორტსმენია, რომელმაც საქმიანობა ბიზნესსა და პოლიტიკაში გააგრძელა. საბჭოთა კავშირის დაშლის შემდეგ კი მან უზარმაზარი ქონება სათამაშო ბიზნესით, ალკოჰოლური სასმელების წარმოებითა და სამთო-მოპოვებითი მრეწველობით დააგროვა.

ფოტო: The Guardian

გაგიკ წარუკიანი პრემიერ-მინისტრ ნიკოლ ფაშინიანის მთავარი სამიზნე გახდა, რომელიც ხელისუფლებაში 2018 წელს, ოლიგარქიასთან ბრძოლის პირობით მოვიდა. ნიკოლ ფაშინიანი მას მუდმივად კორუმპირებული წარსულის სიმბოლოდ წარმოაჩენს და ხშირად მის ძველ, საბჭოთა კავშირის დროს ჩადენილ კრიმინალურ საქმეებსაც კი ახსენებს.