ჯიმ კერი შობის კიდევ ერთხელ მოსაპარად ემზადება.

64 წლის მსახიობი მოლაპარაკებებს აწარმოებს, რათა ფილმის, როგორ მოიპარა გრინჩმა შობა, გაგრძელებაში გრინჩის როლი ხელახლა შეასრულოს.

რონ ჰოვარდი, რომელმაც პირველი ფილმი გადაიღო, სავარაუდოდ, რეჟისორის სავარძელს დაუბრუნდება. 72 წლის ჰოვარდი ბრაიან გრეიზერთან ერთად ფილმის პროდიუსერიც იქნება.

სიახლე 18 ივნისს რეჟისორისა და Imagine Entertainment-ის მიერ გამოქვეყნებულმა ინსტაგრამ პოსტმა დაადასტურა. მათ გრინჩის ფორმაში გამოწყობილ ჯიმ კერის ფოტოს შემდეგი აღწერა დაურთეს: "როგორ მოიპარა გრინჩმა შობას გაგრძელებაზე მუშაობა დაწყებულია".

ჯერჯერობით უსათაურო ფილმის სცენარზე, გავრცელებული ინფორმაციით, ალეკ ბერგი, ჯეფ შაფერი და დევიდ მანდელი იმუშავებენ.

როგორ მოიპარა გრინჩმა შობა დოქტორ სუზის 1957 წლის ამავე სახელწოდების საბავშვო წიგნის მიხედვითაა გადაღებული. პირველ ფილმში მონაწილეობდნენ: ჯეფრი ტამბორი, კრისტინ ბარანსკი, ბილ ირვინი, ტეილორ მომსენი და მოლი შენონი, ხოლო მთხრობლის როლს ენტონი ჰოპკინსი ასრულებდა. ფილმმა დიდ წარმატებას მიაღწია — 2000 წელს ამერიკის მასშტაბით ყველაზე შემოსავლიანი ფილმის ტიტული მოიპოვა, ხოლო 2001 წლის ოსკარის დაჯილდოებაზე საუკეთესო მაკიაჟისა და ვარცხნილობის ნომინაციაში გაიმარჯვა.

როგორც ცნობილია, ჯიმ კერი, რომელმაც ამ როლისთვის ოქროს გლობუსის ნომინაციაც დაიმსახურა, სრულად აკმაყოფილებდა 1991 წელს გარდაცვლილი დოქტორ სუზის მკაცრ მოთხოვნებს. სუზის ფონდის წერილში, სადაც მითითებული იყო, რომ გრინჩის როლის შემსრულებელს ძალიან კონკრეტული სიმაღლე და აღნაგობა უნდა ჰქონოდა, მოყვანილი იყო იმ მსახიობების მაგალითები, რომლებიც ამ მახასიათებლებს შეესაბამებოდნენ, მათ შორის: ჯიმ კერი, ჯეკ ნიკოლსონი, რობინ უილიამსი და დასტინ ჰოფმანი.

ფოტო: People

კერიმ 2024 წელს განაცხადა, რომ მზად იქნებოდა გრინჩის როლს დაჰბრუნებოდა, თუ პერსონაჟის მწვანე ბეწვსა და მძიმე პროთეზებს რამეს მოუხერხებდნენ: "საქმე ისაა, რომ გადაღების დღეს ტონა მაკიაჟი მესვა და ძლივს ვსუნთქავდი, ვიტანჯებოდი. მაგრამ სულ ბავშვებზე ვფიქრობდი და ჩემს თავს ვუმეორებდი: 'ეს ბავშვებისთვისაა. ეს ბავშვებისთვისაა. ეს ბავშვებისთვისაა'. ახლა კი, ახალი ტექნოლოგიების წყალობით, ყველაფერს უფრო თავისუფლად გავაკეთებთ".