ადგილობრივი თვითმმართველობის არჩევნებში გამარჯვებული თბილისის მერობის კანდიდატი კახა კალაძე დღეს, 25 ოქტომბერს საკრებულოს უმრავლესობის მომავალ წევრებს შეხვდა.

კალაძემ განაცხადა, რომ წინასაარჩევნოდ, მის მიერ შემუშავებული შვიდი პოლიტიკიდან გამოყოფს თითო პროექტს და წელსვე დაიწყებს მათ განხორციელებას.

როგორც თბილისის მერობის გამარჯვებულმა კანდიდატმა აღნიშნა, ამას გუნდურად მუშაობით და საკრებულოსთან მჭიდრო თანამშრომლობით გეგმავს.

როგორც ქართული ოცნების მიერ გავრცელებულ განცხადებაში წერია, შეხევდრაზე მან გუნდის წევრებს უთხრა, რომ გარდამავალ პერიოდში, დაგეგმილი პროექტების განხორციელების მიზნით, საერთაშორისო საფინანსო ორგანიზაციებსა და ცენტრალური ხელისუფლების წარმომადგენლებთან შეხვდება:

"ძალიან დიდია ინტერესი და გვექნება შესაძლებლობა, მომდევნო წლების განმავლობაში მათთან თანამშრომლობით და მეგობრობით ეს პროექტები იქნეს განხორციელებული ჩვენი ქალაქისთვის. ასევე, ვაპირებთ სამინისტროებთან შეხვედრას, რადგან, როგორც გითხარით, ცენტრალურ ხელისუფლებასთან კარგი ურთიერთობა არის ძალიან მნიშვნელოვანი და შესაბამისად, როდესაც ჩვენ უკვე მოგვეცემა შესაძლებლობა შევიდეთ მერიაში და საკრებულოში, უკვე პირველივე დღიდან დავიწყებთ მუშაობას, კონკრეტული ნაბიჯების გადადგმას".