მრავალწლიანი ლოდინის შემდეგ 2026 წელს ჰარი პოტერი ბრუნდება. HBO-ს ჰარი პოტერის სერიალის პირველი სეზონი 2026 წლის 25 დეკემბერს, შობის დღეს გამოდის. განსხვავებული ემოციების, მოლოდინებისა და აზრთა სხვადასხვაობის შემდეგ, საბოლოოდ, რამდენიმე თვეში ვიხილავთ ფენომენად ქცეული წიგნებისა და ფილმების სერიის ახალ ადაპტაციას.

მანამდე კი, HBO-მ სერიალის გადაღების მიღმა არსებული პროცესების უკეთ გასაცნობად დოკუმენტური ფილმი შემოგვთავაზა. ჰარის პოვნა: მაგიის მიღმა არსებული ხელობა 30-წუთიანი ფილმია, რომლის პრემიერაც 5 აპრილს შედგა.

დოკუმენტური ფილმი მასშტაბური გადაღების პროცესის დეტალებს გვიზიარებს — მათ შორის, გვიყვება ჰარის, რონისა და ჰერმიონის მსახიობების შერჩევის პროცესებსა და სერიალში მონაწილე ანიმატრონიკი ცხოველების შექმნაზე.

"ჰარი პოტერის სამყარო უკვე ლეგენდარულია," — ამბობს ნიკ ფროსტი, ფილმის მთხრობელი — "მის მაგიას ახალი თაობები ეცნობიან და მისი მემკვიდრეობაც კიდევ უფრო იზრდება. წინ ახალი, ამაღელვებელი ეპოქა გველის".

კასტინგის დირექტორები, ემილი ბროკმანი და ლუსი ბევანი იხსენებენ, რომ შოუსთვის 40 000-ზე მეტ მსახიობს მოუსმინეს, იმდენს, რომ ბოლოს სათვალავიც კი აერიათ. თავდაპირველად, გაერთიანებული სამეფოს მასშტაბით, ბავშვებს სერიალში მონაწილეობაზე ონლაინ განაცხადის გაგზავნა შეეძლოთ. ამის შემდეგ კი კასტინგის ჯგუფი მანჩესტერში, შოტლანდიაში, ირლანდიასა და კარდიფში გაემგზავრა, რათა ოქროს სამეულის — ჰარის, რონისა და ჰერმიონის როლებისთვის შესაფერისი მსახიობები პირადად შეერჩიათ.

ფოტო: Aidan Monaghan/HBO

ალასტერ სტაუტმა (რონ უისლიმ) კასტინგი მანჩესტერში გაიარა. დირექტორებმა ჩათვალეს, რომ ის შარმიანი და სასაცილო მსახიობი იყო. არაბელა სტენტონი (ჰერმიონ გრეინჯერი) დირექტორებს ლონდონში შეხვდა და ლექსი Invictus წაიკითხა, შემდეგ კი უფრო იუმორისტული სცენა შეასრულა, რათა ეჩვენებინა, რომ მხიარული როლის მორგებაც შეეძლო.

დომინიკ მაკლაფლინი (ჰარი პოტერი) კი გლაზგოს კასტინგზე თავისი უქმე დღეების შესახებ დაწერილი ლექსით წარდგა. დირექტორები დომინიკის "ჩუმი თავდაჯერებულობით" მოიხიბლნენ: "ზრდასრულების სამყაროს მიმართ სკეპტიკურადაა განწყობილი. მასში არის რაღაც მგრძნობიარე, მელანქოლიური და მარტოსული".

ფოტო: Lara Cornell / HBO

კასტინგის დირექტორებს მსახიობების ასარჩევად წინასწარ ჰქონდათ გარკვეული მითითებები. ჰარი პოტერის მსახიობისთვის, როგორც თქვეს, მითითება შემდეგნაირი იყო: "ვიპოვოთ 10 წლის შესანიშნავი მსახიობი".

ისეთი ბავშვი გჭირდება, რომელიც ერთი შეხედვით ჩვეულებრივს ჰგავს, თუმცა სინამდვილეში არაჩვეულებრივია

ფოტო: HBO Max

სერიალში წარმოდგენილი თითოეული ცხოველი ბუნებაში მათი რეალური ანალოგების მრავალსაათიანი კვლევისა და დაკვირვების შედეგად შეიქმნა.

"გუნდური მუშაობის კულმინაციას ვხედავთ", — განაცხადა ლორა სინდალმა და მაყურებელს შოუსთვის შექმნილი ბუების პროტოტიპები გააცნო. ეს ბუები ლითონისა და პლასტმასისგანაა დამზადებული და ისეა დაპროექტებული, რომ ზუსტად გაიმეოროს ნამდვილი ბუების მოძრაობები. სხეულის აწყობის შემდეგ ბუმბულების გუნდი თითოეულ ბუმბულს სათითაოდ ამაგრებს ბადეზე, რომელიც ბუს კარკასზეა დაწებებული.

თითოეულ ბუზე დაახლოებით 36 000 ბუმბულია დამაგრებული, ჯამში კი სერიალისთვის 10 ბუ დაამზადეს.

ფოტო: HBO

შოუში ასევე ვიხილავთ სკაბერსის (რონის ვირთხის) ახალ და გაუმჯობესებულ ვერსიას — ამჯერად ის სხეულში ჩამონტაჟებული ძრავებითაა შექმნილი, რათა ცოცხალი მოძრაობების იმიტაცია შეძლოს.

ჩვენთვის უკვე ნაცნობი ცხოველების გარდა სერიალში შეგვხვდება აქამდე უნახავი გომბეშო, ცეცხლოვანი კიბორჩხალები და ფლაბერჭიები.

იხილეთ ფილმის ტრეილერი:

ასევე იხილეთ: