ყველას გამოგვიცდია, ალბათ, შიმშილის მოულოდნელად მოვარდნილი ის ტალღა, მაცივრის ძრავის ხმას რომ გვაგონებს ხოლმე კედლებს მიღმა; ან კიდევ, თაროზე დაწყობილ უგემრიელეს საჭმელს მთელი სიცხადით წარმოგვადგენინებს და გვაფიქრებინებს, რომ თუ ყველაფერს სასწრაფოდ არ ვშთანთქავთ, სამყარო დასრულდება.

თუმცა, ხშირად ეს ძლიერი შიმშილი ისეთი სწორი და ობიექტური სიგნალიც არ არის, როგორადაც გვეჩვენება. ხანდახან ის მართლა ტალღას ჰგავს — მოდის, პიკს აღწევს და თუ მაშინვე არ ავყევით, ცოტა ხანში მშვიდდება კიდეც.

ფოტო: Giphy

ამ დროს, იმის ნაცვლად, რომ პირველივე იმპულსზე მაცივრის კართან მივვარდეთ, უბრალოდ უნდა მოვიცადოთ. ხშირად ტვინის (და კიდევ უფრო მეტად, კუჭის) ეს გამაწვრილებელი ხმაური დაახლოებით 15-20 წუთი გრძელდება, მერე კი ქრება.

არ შეგეშალოთ, იმას ნამდვილად არ გეუბნებით, რომ შიმშილი უნდა დავაიგნოროთ ან თავი ძალით ვაშიმშილოთ. უბრალოდ, იმის გარჩევა უნდა ვისწავლოთ, რა არის ნამდვილი, ფიზიკური შიმშილი და როდის გვინდება ჭამა მხოლოდ იმიტომ, რომ დავიღალეთ, მოვიწყინეთ ან ავნერვიულდით.

რა უნდა ვქნათ ამ 20 წუთის განმავლობაში?

ვიდრე მაცივრისკენ ჩქარი ნაბიჯით გაემართები, საკუთარ თავს შემოუძახე — 20 წუთი მოცდა ხომ ნამდვილად შეგიძლია! დააკვირდი: თუ დროის გასვლის შემდეგ მაინც გეშიება, მერე ჭამე. ამით ორგანიზმს საშუალებას მისცემ, გაარკვიოს, ნამდვილად საჭმელი სჭირდებოდა თუ ეს უბრალოდ იმპულსური შემოტევა იყო.

წყლის დალევაც აუცილებლად დაგეხმარება, ან ყურადღების სხვა რამეზე გადატანა — შეგიძლია ის კარადა მიალაგო, რომლის დალაგებაც ასე დიდი ხანია გინდა და დრო არასდროს გამოგიჩნდა. ფანჯარასთან რამდენიმე წუთით დადგომაც კარგი საშუალებაა. მთავარია, საკუთარ თავს ცოტა დრო მისცე, რომ პიკმა გადაიაროს.

მნიშვნელოვანია ისიც, რომ შიმშილის გადავადება საკუთარ თავთან ომად არ იქცეს. თუ 20 წუთის გასვლის შემდეგ ჭამა ისევ გინდა, მაშინ ეს ნამდვილად ფიზიკური შიმშილია. უბრალოდ, პაუზის შემდეგ უფრო გააზრებულად შეარჩევ, რა და რამდენი ჭამო.

ისე კი, თუ მძაფრი შიმშილის ტალღები ხშირად გაქვს, შეიძლება პრობლემა ნებისყოფაში საერთოდ არ იყოს. ზოგჯერ ეს იმის ნიშანია, რომ დღის განმავლობაში საკმარისად არ ჭამ ან ზედმეტად დიდი შუალედებით ჭამ. შეიძლება, ცილა და ბოჭკოც გაკლია და ალბათ, სხეულიც ამის გამო ხშირად ვარდება პანიკაში.

გახსოვდეს, 20 წუთი მოცდა ბევრად უფრო მარტივად მიღწევადი მიზანია, ვიდრე საკუთარ თავთან დაუსრულებელი ბრძოლა.