Game of Thrones-ის ვარსკვლავი სოფი ტერნერი ამაზონის მომავალ სერიალში ლეგენდარულ ლარა კროფტს ასახიერებს, რომლის შოურანერიც ფიბი უოლერ-ბრიჯია (Fleabag). 15 იანვარს Prime Video-მ გაავრცელა ტერნერის პირველი ოფიციალური ფოტო ამ როლში და დაადასტურა, რომ გადაღებები უკვე დაწყებული იყო. მიუხედავად იმისა, რომ Tomb Raider-ის შესახებ არაერთი ფილმი, სერიალი და ვიდეოთამაში არსებობს, ეს პირველი შემთხვევაა, როცა ფრენჩაიზს მხატვრული სერიალის ფორმატში ვნახავთ.

სოფი ტერნერი ლარა კროფტის როლში, ამაზონის მომავალ სერიალში Tomb Raider

ფოტო: Amazon MGM Studios

ახლა კი Amazon MGM Studios-მა Entertainment Weekly-ს განუცხადა, რომ "სოფი ტერნერმა ცოტა ხნის წინ მცირე ტრავმა მიიღო. სიფრთხილის მიზნით, გადაღებები დროებით შეჩერდა, რათა მას აღდგენის დრო მიეცეს. ვიმედოვნებთ, მუშაობას რაც შეიძლება მალე განვაახლებთ".

სტუდიის განცხადება ადასტურებს, რომ ტერნერის ტრავმა მსუბუქია და გადაღებები მხოლოდ დროებით არის შეჩერებული. მსახიობი გამოჯანმრთელებისთანავე დაუბრუნდება როლს. სერიალს ჯერჯერობით არც გამოსვლის ზუსტი თარიღი აქვს და არც სავარაუდო დროის ფანჯარა, ამიტომ უცნობია, მოახდენს თუ არა ეს შეფერხება რამე გავლენას პრემიერის დროზე.

ლარა კროფტის როლი ადრე ცნობილ მხატვრულ ფილმებში ანჯელინა ჯოლიმ შეასრულა. 2018 წლის ფილმში კი მთავარი გმირი ალისია ვიკანდერმა ითამაშა. Prime Video-ს ახალ სერიალში ტერნერთან ერთად მონაწილეობენ სიგურნი უივერი, ჯეისონ აიზექსი, მარტინ ბობ-სემპლი, ბილ პატერსონი, სელია იმრი და პატერსონ ჯოზეფი.

ასევე ნახეთ: ყველაფერი, რაც ლარა კროფტის ახალ სერიალზე ვიცით