ტენესის შტატის ქალაქ მანჩესტერში მომხდარი ერთი ჩვეულებრივი შემთხვევა ნამდვილ სასწაულად იქცა. ბრიტანი სმიტმა, რომელმაც DoorDash-ის ხანდაზმული კურიერის დასახმარებლად საქველმოქმედო კამპანია წამოიწყო, თითქმის $1 მილიონი შეაგროვა, რათა 78 წლის რიჩარდმა პენსიაზე გასვლა შეძლოს.

ყველაფერი ერთი შეკვეთით დაიწყო

ისტორია გასულ სამშაბათს დაიწყო, როდესაც ბრიტანიმ შეამჩნია, რომ მისმა ყოფილმა მეუღლემ მათ ქალიშვილს სტარბაქსი გამოუგზავნა. ბრიტანი თავიდან გაბრაზდა კიდეც, ის ცდილობს, შვილს ტკბილეული მხოლოდ ჯილდოს სახით მისცეს, ეს კი კვირაში უკვე მესამე შეკვეთა იყო. თუმცა, როდესაც კარის ზარის (Ring) აპლიკაცია ჩართო, ბრაზი გაოცებამ და თანაგრძნობამ შეცვალა.

კამერამ დააფიქსირა ხანდაზმული მამაკაცი, წითელ ფლანელის პერანგსა და ხაკისფერ შარვალში, რომელიც მოაჯირს ეჭიდებოდა და დიდი გაჭირვებით ამოდიოდა კიბეებზე.

78 წლის რიჩარდი შეკვეთას ტოვებს ბრიტანი სმიტთან

ფოტო: Gofund.me

"ეს საწყალი კაცი წვალებით ამოდის ჩემს კიბეებზე, რათა ჩემს სრულიად ჯანმრთელ ქალიშვილს ყავა მოუტანოს", — იხსენებს სმიტი. ბრიტანის ყოფილი მეუღლე კვადრიპლეგიითაა დაავადებული და გადაადგილება არ შეუძლია, რის გამოც ნივთებს ხშირად სახლში უკვეთავს.

ბრიტანიმ სცადა აპლიკაციით უფრო დიდი "ჩაი" დაეტოვებინა, მაგრამ სისტემამ ამის საშუალება აღარ მისცა. მაშინ მან გადაწყვიტა, მოხუცი სოციალური ქსელების მეშვეობით ეპოვა. Facebook-ის მომხმარებლებმა რიჩარდი მალევე იცნეს, აღმოჩნდა, რომ ის ხშირად აკითხავდა ადგილობრივ ოფისებს.

ფოტო: Gofund.me

ბრიტანიმ რიჩარდის სახლს მიაკვლია და თავდაპირველად $200 გადასცა. მოხუცმა ფული მხოლოდ მას შემდეგ გამოართვა, რაც დარწმუნდა, რომ ბრიტანის ეს თანხა თავად არ აკლდებოდა. აქვე გაირკვა კურიერობის მიზეზიც: რიჩარდის მეუღლემ სამსახური დაკარგა, მათ დანაზოგი კი ცოლის ძვირადღირებულ მედიკამენტებსა და ყოველთვიურ ხარჯებს მოხმარდა. კაცი იძულებული გახდა, შემოსავლის შესავსებად კურიერობა დაეწყო.

$1 მილიონი და ახალი ცხოვრება

ბრიტანიმ GoFundMe-ზე კამპანია დაიწყო სახელწოდებით "მიეცით რიჩარდს პენსიაზე დაბრუნების შანსი“. ვიდეო TikTok-ზე ვირუსულად გავრცელდა და შედეგმა მოლოდინს გადააჭარბა:

  • შეგროვილი თანხა: $940,000-ზე მეტი (თითქმის $1 მილიონი);
  • დონორთა რაოდენობა: 32,000-ზე მეტი ადამიანი.

"რიჩარდმა მითხრა, რომ ორი დღეა არ უძინია, რადგან თვალს ვერ წყვეტს, როგორ იზრდება თანხა საიტზე", — ამბობს სმიტი. თავად რიჩარდმა გვარის გამჟღავნება არ ისურვა, თუმცა ბრიტანი აღნიშნავს, რომ ის ცხოვრებაში იმაზე ბევრად უფრო "ძვირფასი ადამიანია", ვიდრე ვიდეოში ჩანდა.

ფოტო: Gofund.me

პლატფორმა GoFundMe პირდაპირ მუშაობს ბრიტანისთან, რათა უზრუნველყოს, რომ ყოველი ცენტი უსაფრთხოდ მივიდეს რიჩარდამდე და მან საბოლოოდ შეძლოს დამსახურებულ პენსიაზე გასვლა.

ნახეთ ვიდეო: