დიახ, არ მოგესმათ, მაიკ ვაზოვსკისა და სალის დუეტს ეკრანებზე კიდევ ერთხელ ვიხილავთ.

როგორც Wall Street Journal-ის ვრცელ სტატიაში ვკითხულობთ, Pixar მონსტრების კორპორაციის მესამე ნაწილის გამოშვებას გეგმავს, თუმცა ჯერჯერობით უცნობია, ვინ იმუშავებს ანიმაციაზე და რას შეეხება ფილმის ახალი ნაწილი.

ფოტო: Buena Vista Pictures

აღსანიშნავია, რომ სამომავლოდ Pixar-ს აქვს დაგეგმილი არაერთი სიქველი, მათ შორის — Toy Story 5, რომელიც კინოთეატრებში 19 ივნისს გამოვა, სუპერ ოჯახი 3, რომლის პრემიერაც 2028 წელს იგეგმება და Coco-ს მეორე ნაწილი, რომელსაც 2029 წლისთვის უნდა ველოდოთ.

გარდა ამისა, სტუდია ახალ-ახალი, ორიგინალი ანიმაციების გამოშვებასაც გეგმავს. მათი ერთ-ერთი იდეა "აზიური მითებით შთაგონებული ანიმაციური ფილმის შექმნაა ზებუნებრივ ადგილზე, სადაც ცოცხლები და მკვდრები ერთმანეთს ხვდებიან". ამასთანავე, Pixar მათი პირველი მიუზიკლის გამოშვებას გეგმავს, რომლის რეჟისორი დომი შია.

რაც შეეხება მონსტრების კორპორაციის ფრენჩაიზს, ანიმაციური ფილმის პირველმა ნაწილმა — რომლის რეჟისორი პიტ დოკტერია და მთავარ პერსონაჟებს ჯონ გუდმენი და ბილი კრისტალი ახმოვანებენ — კინოგაქირავებას მსოფლიო მასშტაბით $524 მილიონი დოლარი მოუტანა. ხოლო, ფილმის მეორე ნაწილს გულშემატკივრების დიდ სიყვარულთან ერთად, ფინანსური წარმატებაც ხვდა წილად და მსოფლიო მასშტაბით $743 მილიონი დოლარი გამოიმუშავა.