ბათუმის ძველი ბულვარის ცენტრალურ შესასვლელში მდებარე ქორწინების სახლს ანგერევენ — ინფორმაციას აჭარა თაიმსი ავრცელებს.

როგორც აჭარის მთავრობის ადმინისტრაციაში აცხადებენ, ქორწინების სახლის დემონტაჟი ქართული ოცნების აჭარის მთავრობის და იუსტიციის სამინისტროს ინიციატივაა. ადმინისტრაციაში აღნიშნეს, რომ ქორწინების სახლის დაშლა ბულვარის განაშენიანების გეგმას ექვემდებარება და საზოგადოების მრავალწლიანი მოთხოვნასაც ითვალისწინებს.

მათივე განმარტებით, შენობა ამორტიზებულია და განაშენიანების გეგმით განსაზღვრულ სადემონტაჟო ობიექტთა ნუსხაში მოხვდა.

"ქორწინების სახლი თავისი მოცულობითა და განლაგებით ზღუდავდა ბულვარის მთავარი შესასვლელის სივრცით აღქმას, ასევე, ამორტიზებული შენობა-ნაგებობა არ შეესაბამებოდა შესაბამის სტანდარტებს, რის საფუძველზეც იგი შეტანილ იქნა განაშენიანების გეგმით განსაზღვრულ სადემონტაჟო ობიექტთა ნუსხაში.

აჭარის მთავრობის მხარდაჭერით, იუსტიციის სახლი შეიმუშავებს ახალ კონცეფციას და ქორწინების სახლი ახალ ბულვარში ალტერნატიულ ადგილას აშენდება", — ნათქვამია აჭარის მთავრობის მიერ გავრცელებულ ინფორმაციაში.