ესპანელ მომღერალს, ხულიო იგლესიასს, ორი ქალი, რომლებიც ადრე მასთან მუშაობდნენ, სექსუალურ ძალადობაში ადანაშაულებს. მათი თქმით მომღერალი "ნორმალიზებას უკეთებდა ძალადობას" იძულებით, მუქარის შემცველ და ძალადობრივ გარემოში.

ესპანური საინფორმაციო საიტის elDiario.es-ისა და ამერიკული გამოცემის Univision-ის რეპორტაჟებში გამოქვეყნებულ ბრალდებებს ესპანეთის სასამართლო იძიებს.

82 წლის მომღერალი ცნობილია 1960-იანი წლებიდან და მთელ მსოფლიოში მილიონობით ჩანაწერი აქვს გაყიდული.

ხულიო იგლესიას ორი ქალი დომინიკის რესპუბლიკაში და ბაჰამის კუნძულებზე, თავის საკუთრებაში ჰყავდა დასაქმებული. მათი ჩვენებების თანახმად, სექსუალური ძალადობა 2021 წელს მოხდა. იგლესიასი და მისი ადვოკატი ბრალდებებს არ პასუხობენ.

ერთ-ერთმა გამოკითხულმა ქალმა, რებეკამ, (სახელი შეცვლილია) რომელიც დამხმარე ქალად მუშაობდა, თქვა, რომ მომღერალი დღის ბოლოს რეგულარულად იძახებდა მას თავის ოთახში და თანხმობის გარეშე არასათანადოდ ეხებოდა.

"ის თითქმის ყოველ ღამე მეხებოდა, თავს ობიექტად, მონასავით ვგრძნობდი".

რებეკა დომინიკელია და 22 წლის იყო, როდესაც აღწერილი სავარაუდო მოვლენები მოხდა. ის, ყვება, როგორ აიძულა იგლესიასმა სექსუალური ურთიერთობა სხვა თანამშრომელ ქალთან ერთად, როგორ გაარტყა მომღერალმა სახეში და შეეხო სასქესო ორგანოებს.

მეორე ქალმა, ვენესუელელმა ფიზიოთერაპევტმა, რომლის სახელიც სტატიაში ლორაა, განაცხადა, რომ იგლესიასმა მისი ნების საწინააღმდეგოდ შეეხო მკერდზე და აკოცა. მან დასძინა, რომ მომღერალი მუდმივად ემუქრებოდა სამსახურიდან გათავისუფლებით, აკონტროლებდა, რამდენ საკვებს მიირთმევდა და ეკითხებოდა, როდის დაეწყებოდა მენსტრუაცია.

"ის ყოველთვის მეუბნებოდა, რომ მსუქანი ვიყავი და წონაში უნდა დამეკლო" — თქვა ლორამ და აღწერა სამუშაო გარემო, სადაც ძალადობა ნორმალიზებული იყო.

მიუხედავად იმისა, რომ მისი თქმით, ხშირად უარყოფდა მომღერლის სექსუალურ შეთავაზებებს, "იყვნენ სხვა გოგონები, რომლებსაც უარის თქმა არ შეეძლოთ. და ის მათთან იმას აკეთებდა, რაც სურდა".

გამოცემები, რომლებმაც საქმე სამი წლის განმავლობაში ერთად გამოიძიეს, აცხადებენ, რომ ბრალდებებს დოკუმენტური მტკიცებულებები ამყარებს, მათ შორის ფოტოები, სატელეფონო ჩანაწერები, ტექსტური შეტყობინებები და სამედიცინო დასკვნები.

მათ ანგარიშებში მოყვანილია იგლესიასის სხვა ყოფილი თანამშრომლები, რომლებიც აღწერენ მისთვის მომუშავე პირებისთვის საშიშ, უაღრესად სტრესულ ატმოსფეროს.

ცნობილია, რომ რებეკამ და ლორამ 5 იანვარს იგლესიასის წინააღმდეგ სარჩელი შეიტანეს სექსუალური ძალადობისა და ადამიანებით ვაჭრობისთვის ეროვნულ სასამართლოში, რომელიც ესპანეთის საზღვრებს გარეთ ჩადენილ დანაშაულებს იძიებს.

იგლესიასის ძველმა მეგობარმა, ხაიმე პენიაფიელმა, ბრალდებებს "აბსოლუტური ტყუილი" უწოდა. კიდევ ერთმა მოკავშირემ, ჟურნალისტმა მიგელ ანხელ პასტორმა, თქვა, რომ მას არასდროს სმენია "არანაირი მინიშნება იმის შესახებ, რომ შესაძლოა მან ჩაიდინა ამ ტიპის ქმედება".

თუმცა, ესპანეთის სოციალისტების მიერ ხელმძღვანელობით მოქმედი მთავრობის თანასწორობის მინისტრმა, ანა რედონდომ, განაცხადა, რომ იმედოვნებს, რომ საქმე სრულად იქნება გამოძიებული.

"როდესაც თანხმობა არ არის, ეს ძალადობაა", — დაწერა მან სოციალურ მედიაში.

ულტრამემარცხენე პარტია პოდემოსის ლიდერის, იონე ბელარას თქმით კი, დროა დასრულდეს დუმილი ფულით დაცული "ცნობილი მოძალადეების" მიერ სექსუალური ძალადობის შემთხვევებზე.

მადრიდის რეგიონის პრეზიდენტმა, კონსერვატორმა იზაბელ დიას აიუსომ, ესპანელი მომღერლის მიმართ მხარდაჭერა გამოხატა.

"მადრიდის რეგიონი არასდროს შეუწყობს ხელს ხელოვანების და მით უმეტეს, ყველაზე უნივერსალური მომღერლის, ხულიო იგლესიასის ცილისწამებას", — დაწერა მან სოციალურ მედიაში.

ბრალდებებს გამოეხმაურნენ იგლესიასის ბიოგრაფი, იგნასიო პეირო და ავტორის გამომცემლობა და მსხვერპლებისადმი მხარდაჭერა და სოლიდარობა გამოხატეს. მათი თქმით, ბრალდებების დასამატებლად გააახლებენ მომღერლის გასულ წელს გამოქვეყნებულ ბიოგრაფიას.